मुंबईच्या सराफ व्यापाऱ्याला समृद्धी महामार्गावर लूटले; पाच किलो सोने लंपास; टॅक्सीचालकाचा कटात सहभाग!
घटनेची माहिती मिळताच मेहकर पोलिसांनी घटनास्थळी धाव घेत जखमी व्यापाऱ्याला रुग्णालयात दाखल केले. पोलिसांनी तातडीने नाकाबंदी करून दरोडेखोरांचा शोध घेतला, मात्र ते पसार होण्यात यशस्वी झाले. दरम्यान, दरोडेखोरांची कार अकोला जिल्ह्यातील पातूर तालुक्याजवळ सोडून दिलेली आढळून आली आहे. पुढील तपास मेहकर पोलिस करत आहेत.
मिळालेल्या माहितीनुसार, शेषमलजी जैन हे मुंबईतील झवेरी बाजारातील ‘मंगळसूत्रम’ नावाच्या प्रतिष्ठानात कार्यरत असून, त्या प्रतिष्ठानचे मालक महेशभाई हे सुवर्ण आभूषण संघटनेचे अध्यक्ष आहेत. ऑर्डर घेण्यासाठी जैन हे विविध ठिकाणी प्रवास करत असतात. जिल्ह्यात आल्यानंतर त्यांनी मुंबईकडे जाण्यासाठी समृद्धी महामार्ग निवडला होता. याचाच फायदा घेत दरोडेखोरांनी हा डाव आखल्याचा संशय व्यक्त होत आहे. पोलिसांच्या तपासानुसार, टॅक्सीचालकाने दरोडेखोरांशी संगनमत करून लूट केली असावी, असा अंदाज वर्तवला जात आहे.