जि.प.चे साडेचार हजार कर्मचारी पूरग्रस्तांसाठी देणार एक दिवसाचे वेतन..!
अलीकडील दोन महिन्यांपासून झालेल्या ढगफुटीसदृश पावसामुळे विविध ठिकाणी पूरस्थिती निर्माण झाली. शेतांमध्ये पाणी साचून पिकांचे प्रचंड नुकसान झाले, शेतजमिनी खरडून गेल्या, अनेक गावांना पुराचा वेढा बसला. यामुळे मनुष्यहानीसह गुरेढोरे वाचली नाहीत, तर घरगुती साहित्य वाहून गेले. शेतकरी व सर्वसामान्य नागरिकांवर ओढवलेल्या या संकटात सामाजिक बांधिलकीतून जिल्हा परिषद कर्मचारी युनियनने मदतीचा हात पुढे केला आहे.
या उपक्रमात संघटनेचे प्रदेश उपाध्यक्ष विजय तांदुळकर, जिल्हाध्यक्ष राजेश वाइंदेशकर, सरचिटणीस प्रदीप सपकाळ, सचिव अनिल सुसर, विभागीय संघटक प्रवीण गिते, जिल्हा संपर्कप्रमुख विजया सोनुने, महिला आघाडी उपाध्यक्ष पी. एस. गायकवाड, सरचिटणीस अश्विनी मेटकर, जयमाला राठोड, राहुल कासारे, एम. पी. सोनुने, प्रमोद डांगे, अनिल पवार, सुनील लोखंडे आदी पदाधिकाऱ्यांनी सर्व कर्मचाऱ्यांच्या वतीने एक दिवसाच्या वेतन कपातीचे निवेदन सादर केले आहे.