EXCLUSIVE पालकमंत्री मकरंद आबांचा लोड कमी! जिल्ह्याला मिळाले सह– पालकमंत्री! संजय सावकारे जिल्ह्याचे सह–पालकमंत्री; सावकारेंची संपत्ती किती? वाचा
Aug 26, 2025, 09:28 IST
बुलडाणा(बुलडाणा लाइव्ह वृत्तसेवा): जिल्ह्याचे पालकमंत्री मकरंद आबा पाटील यांचा लोड आता कमी झाला आहे, कारण पालकमंत्री पदाची महत्त्वाची जबाबदारी सांभाळण्यासाठी जिल्ह्याला सहपालकमंत्री मिळाले आहेत. संजय सावकारे आता बुलढाणा जिल्ह्याचे सह पालक मंत्री म्हणून मकरंद आबा पाटील यांना सहकार्य करत आहेत. याआधी संजय सावकारे हे भंडारा जिल्ह्याचे पालकमंत्री होते, मात्र त्यांच्याकडून ती जबाबदारी काढून घेत त्यांना बुलढाणा जिल्ह्याचे सहपालक मंत्री करण्यात आले आहे. ५६ वर्षीय संजय सावकारे भुसावळ विधानसभा मतदारसंघाचे प्रतिनिधित्व करतात. सध्या सावकारे यांच्याकडे राज्याचे वस्त्रोद्योग मंत्री म्हणून जबाबदारी आहे..
२००९ मध्ये संजय सावकारे भुसावळ विधानसभा मतदारसंघातून राष्ट्रवादी काँग्रेस पक्षाकडून निवडून आले होते. पहिल्यांदाच निवडून आल्यानंतरही आघाडी सरकारच्या कार्यकाळात शेवटच्या एका वर्षासाठी त्यांना कृषी व सामाजिक न्याय राज्यमंत्री म्हणून जबाबदारी देण्यात आली होती. २०१४ च्या विधानसभा निवडणुकीच्या आधी संजय सावकारे यांनी भाजपात प्रवेश केला. त्यानंतर भाजपकडून २०१४, २०१९ आणि २०२४ अशा सलग ३ विधानसभा निवडणुका ते जिंकले. देवेंद्र फडणवीस यांच्या मंत्रिमंडळात संजय सावकारे यांच्याकडे वस्त्रोद्योग खात्याची जबाबदारी आहे.
सावकारे यांची संपत्ती किती?
२०२४ च्या निवडणूकीसाठी दाखल केलेल्या शपथपत्रानुसार त्यांच्याकडे ६ कोटी ८८ लाख ७४ हजार १३८ रुपये एवढी संपत्ती असून, त्यांच्यावर २ कोटी ४३ लाख ३३ हजार २७७ रुपयांचे कर्ज आहे. संजय सावकारे यांनी पहिल्यांदा २००९ मध्ये निवडणूक लढवली तेव्हा त्यांची संपत्ती ४ लाख ७९ हजार ७७ रुपये एवढी होती.