सिलेंडर ९०० पार! मोताळा काँग्रेसचा संताप, दर तात्काळ कमी करण्याची मागणी; महागाईच्या ज्वाळेत जनता होरपळली; गॅस दरवाढीवर काँग्रेस आक्रमक...
व्यावसायिक गॅस सिलेंडरचे दरही १९०० रुपयांपर्यंत पोहोचले असून त्याचे रेशनिंग सुरू असल्याने हॉटेल, खानावळी तसेच छोटे खाद्यव्यवसाय करणाऱ्या व्यावसायिकांना मोठा फटका बसत असल्याचे काँग्रेसने म्हटले आहे. विद्यार्थ्यांपासून कामगार आणि नोकरदारांपर्यंत अनेकांना बाहेर जेवणावर अवलंबून राहावे लागते. अशा परिस्थितीत व्यावसायिक गॅस महाग झाल्यास खाद्यपदार्थांचे दरही वाढण्याची शक्यता असल्याचा इशारा निवेदनात देण्यात आला.
सरकारकडून गॅसची टंचाई नसल्याचा दावा केला जात असला तरी प्रत्यक्षात नागरिकांना सिलेंडर वेळेवर मिळत नसल्याची तक्रार काँग्रेसने केली आहे. त्यामुळे घरगुती तसेच व्यावसायिक गॅस सिलेंडर नागरिकांना विनाअडथळा उपलब्ध करून देण्यासाठी प्रशासनाने तातडीने उपाययोजना कराव्यात आणि वाढवलेल्या किमती त्वरित कमी कराव्यात, अशी मागणी करण्यात आली.
हे निवेदन मोताळा तालुका काँग्रेस कमिटीचे अध्यक्ष प्रवीण (आप्पा) अर्जुन कदम तसेच शहराध्यक्ष निनाभाऊ इंगळे यांच्यासह काँग्रेस पदाधिकाऱ्यांनी तहसीलदारांकडे सादर केले. दरम्यान, जनतेला दिलासा मिळाला नाही तर काँग्रेसकडून तीव्र आंदोलन छेडण्याचा इशाराही यावेळी देण्यात आला.