शिक्षण विभागातील अधिकाऱ्यांच्या अन्यायकारक अटकेचा निषेध; बुलढाण्यात एकदिवसीय सामूहिक रजा आंदोलन; शिक्षण सेवा राजपत्रित अधिकारी संघाने दिले निवेदन..!
Aug 1, 2025, 15:43 IST
बुलढाणा (बुलडाणा लाइव्ह वृत्तसेवा) : बोगस शालार्थ प्रकरणात शिक्षण विभागातील अधिकाऱ्यांवर अन्यायकारक अटकेचा निषेध करण्यासाठी राज्यभरातील शिक्षण सेवा राजपत्रित अधिकारी संघाने १ ऑगस्ट रोजी एकदिवसीय सामूहिक रजा आंदोलन पुकारले आहे. बुलढाणा जिल्हा शाखेच्यावतीने जिल्हाधिकारी व जिल्हा परिषदेच्या मुख्य कार्यकारी अधिकाऱ्यांना याबाबतचे निवेदन सादर करण्यात आले आहे.
मागील काही महिन्यांपासून नागपूर विभागातील बोगस शालार्थ आयडी प्रकरण चर्चेत असून, काही अधिकाऱ्यांना विनाचौकशी अटक करण्यात आली आहे. या पद्धतीने झालेल्या अटकेचा संघटनेने तीव्र निषेध केला आहे. राजपत्रित अधिकारी म्हणून हे अधिकारी प्रामाणिकपणे शासनाची कामे करत असून, त्यांच्यावर जर काही दोष आढळला तर त्यासाठी नियमानुसार विभागीय चौकशीची तरतूद आहे. मात्र, "चोर सोडून संन्याशाला फाशी" या म्हणीप्रमाणे तपास यंत्रणा कार्यरत असल्याचे संघटनेचे म्हणणे आहे. त्यामुळे, शासनाने विनाचौकशी अटकेपासून संरक्षणाची लेखी हमी द्यावी, एसआयटी चौकशी पूर्ण होईपर्यंत शिक्षक-शिक्षकेत्तर वेतन देयकांवर सह्या करण्यात येणार नाहीत, अतिरिक्त सुट्ट्यांच्या दिवशी लादण्यात येणाऱ्या अतिरिक्त कामाचा ताण कमी करण्यात यावा आदी मागणी निवेदनात करण्यात आल्या आहेत. जर या मागण्या मान्य केल्या नाहीत तर दि. ८ ऑगस्ट २०२५ पासून बेमुदत सामूहिक रजा आंदोलन छेडण्यात येईल, असा इशाराही संघटनेने निवेदनात दिला आहे. निवेदनावर शिक्षणाधिकारी माध्यमिक अनिल अकाळ, शिक्षणाधिकारी याेजना डाॅ. वैशाली ठग, उपशिक्षणाधिकारी ए.पी.देवकर, वेतन पथक अधीक्षक ए.जी.निवालकर, प्रकाश कुळे, ए. के. वाघ यांच्यासह इतरांची स्वाक्षरी आहे.