घ्या आता! सरकारने योजना दिली चांगली, पण वेबसाईटच्या गोंधळाने पांगली ; जन्म दाखला मिळेना! वेबसाईटमध्ये तांत्रिक अडचण !

 राज्य सरकारच्या योजनाच नाही तर आता शाळा देखील सुरू झाल्याने विद्यार्थ्यांसाठी जन्मदाखला लागतोय. यासाठी पालक वर्ग कामाला लागले आहे. नगरपरिषदे अंतर्गत रहिवास असलेल्या नागरिकांना जन्म प्रमाणपत्र मिळवण्यासाठी मोठी अडचण निर्माण झाली आहे. नगरपालिकेतून जन्म प्रमाणपत्र काढण्यासाठी एक वेबसाईट आहे. त्या वेबसाईटद्वारे ऑनलाइन पद्धतीने पूर्वी अगदी दहा मिनिटातच जन्मदाखला मिळत असे. परंतु, काही दिवसांपूर्वीच वेबसाईट मध्ये तांत्रिक अडचण झाल्याने अर्धा ते दीड तास एक दाखला मिळवण्यासाठी लागत आहे. यामुळेच नागरिकांसह अधिकाऱ्यांची देखील दमछाक होताना दिसत आहे. तीन तीन घंटे उभे राहून देखील दाखला मिळत नसल्याने नागरिकांची दैना होत आहे.

भाऊ, दहा हप्ते झाले फेऱ्या मारून राहिलो पण अजून काही जन्म दाखला मिळाला नाही असे नागरिक म्हणतात. दरम्यान, या संबंधित नगरपालिकेच्या अधिकाऱ्यांना विचारणा केली असता ते म्हणाले, पालिका प्रशासनाने वेबसाईट अपडेट केली. परंतु अधिकाऱ्यांचे प्रशिक्षण घेतले नाही. त्याविषयी माहिती, अधिकारी कर्मचाऱ्यांपर्यंत योग्य पद्धतीने मिळाली नाही. पूर्वीच्या वेबसाईटने दहा मिनिटातच जन्म दाखला हातात येत असे.. पण आता एक ते दीड तासाचा वेळ लागत असल्याचे संबंधित विभागाचे अधिकारी किशोर गायकवाड यांनी सांगितले.