विवाहबाह्य संबंध ठेवणे म्हणजे पत्नीला आत्महत्येस प्रवृत्त करणे नव्हे; हायकोर्टाचे मत

याप्रकरणात विवाहबाह्य संबंधामुळे पतीने पत्नीचा छळ केल्याचे कोणतेही पुरावे नाहीत. पत्नीचा असह्य मानसिक छळ केल्याचा किंवा आत्महत्येस भाग पाडणारी कोणतीही कृती केल्याचा आरोप नाही. विवाहबाह्य संबंध ही एकमेव बाब आत्महत्येस प्रवृत्त करण्याचा गुन्हा दाखल होण्यासाठी पुरेशी नाही, असेही न्यायालयाने म्हटले आहे. वाशिम जिल्ह्यातील हे प्रकरण असून जानेवारी २०१९ मध्ये पोलिसांनी विवाहितेच्या पतीसह सासरच्यांविरुद्ध आत्महत्येस प्रवृत्त केल्याचा गुन्हा दाखल केला होता.

विवाहिता मानसिक आजारी होती. २०१६ पासून तिच्यावर उपचार सुरू होते.जानेवारी २०१९ मध्ये तिने आत्महत्या केली होती. त्यानंतर विवाहितेच्या आईने जावई व त्याच्या कुटूंबियाविरुद्ध तक्रार दिली होती. मात्र त्यानंतर तक्रारदार सासू आणि जावयात तडजोड झाल्याने गुन्हा रद्द करण्यासाठी त्यांनी न्यायालयात अर्ज दाखल केला होता. उच्च न्यायालयाने हा निर्णय देताना सर्वोच्च न्यायालयाच्या निर्णयाचा आधार घेतला. पिनाकीन रावल प्रकरणात सर्वोच्च न्यायालयाने असाच निर्णय देत पतीचे विवाहबाह्य  संबंध म्हणजे पत्नीला आत्महत्येस प्रवृत्त करणे होऊ शकत नाही, असे म्हटले होते.