Big Breaking : 'स्वाभिमानी' नेते रविकांत तुपकरांना अटक
कायदा हातात न घेता शेतकऱ्यांनी ठरल्याप्रमाणे शेतकऱ्यांनी १८ नोव्हेंबरला प्रभात फेऱ्या काढून गावातील चावडी किंवा पारावर धरणे वा ठिय्या आंदोलन करा, १९ नोव्हेंबरला गावाजवळच्या मार्गावर रास्ता रोको, चक्का जाम करा. २० नोव्हेंबरला आपापल्या कार्यक्षेत्रात कडकडीत बंद पाळा, असे आवाहनही त्यांनी यावेळी केले. दरम्‍यान, तुपकरांच्या आंदोलनामुळे शेतकऱ्यांच्या संतापात भर पडली असून, शांततेच्या मार्गाने सुरू असलेले आंदोलन कायदा-सुव्यवस्‍थेच्या नावाखाली चिरडण्याचाच हा प्रयत्न झाल्याच्या प्रतिक्रिया व्यक्‍त होत आहेत.
रविकांत तुपकर यांच्यासोबत शेकडो कार्यकर्ते व शेतकऱ्यांनीही अन्नत्याग सुरू केलेला आहे. जोपर्यंत मागण्या पूर्ण होत नाहीत तोपर्यंत अन्‍नाचा कणही पोटात जाणार नाही, असे तुपकर यांनी निक्षून सांगितले आहे. त्यामुळे सरकारपुढेही मोठा पेच निर्माण झाल्याचे चित्र आहे. पोल्ट्री संघटनेने आयातीत सोया पेंड वाढविण्याची मागणी केली आहे. यामुळे सोयाबीनचे भाव आणखी पडण्याची भीती श्री. तुपकर यांनी संध्याकाळी पत्रकारांशी बोलताना व्यक्‍त केली होती. हे केवळ स्वाभिमानी शेतकरी संघटनेचे आंदोलन नसून, राजदरबारी देखील उपेक्षित असलेल्या लाखो सोयाबीन, कपाशी उत्पादकांचे आंदोलन आहे. सोयाबीनला किमान ८ हजार, कपाशीला १२ हजार रुपये भाव जाहीर करावा. सोया पेंडची आयात थांबवावी, १०० टक्के पीकविमा, शेतातील लोडशेडिंग व कनेक्शन कापणे बंद करा, सक्तीची वीज वसुली बंद करा, अतिवृष्टीग्रस्तांना भरीव मदत करा आदी मागण्यांसाठी सुरू झालेले आंदोलन आता तुपकरांच्या अटकेनंतर कोणत्या वळणावर जाते, याकडे सर्वांचे लक्ष लागले आहे.