शांत अन्‌ संयमी योगेंद्र गोडे शेतकऱ्यांसाठी आक्रमक होतात तेव्हा...!

आज सकाळी ११ वाजता योगेंद्र गोडे शेकडो शेतकऱ्यांसोबत मोताळ्यातील महावितरण कार्यालयात पोहोचले. अतिवृष्टीची मदत अजून शेतकऱ्यांना पोहोचली नाही. शेतकऱ्यांचे मोठे आर्थिक नुकसान होऊनही भरपाई देण्याऐवजी पैसे वसूल करण्यावर राज्य सरकारचा भर आहे. वीज कनेक्शन तोडल्याने गहू, हरभरा पिकवणारा शेतकरी अडचणीत आला आहे. त्यामुळे शेतकऱ्यांच्या संतापाचा उद्रेक होत आहे. आम्ही कायदा हातात घेतला तर तुम्हाला परवडणार नाही. त्यामुळे ५ दिवसांत वीज कनेक्शन जोडा. जळालेले विद्युत संच त्वरित बदला. अन्यथा शेतकरी तुमच्या कार्यालयात आत्मदहन करतील. शेतकऱ्यांच्या जीवाचे बरे वाईट झाले तर तुम्हाला तोंड दाखवायला जागा ठेवणार नाही, असे गोडे म्हणाले.

गोडेंचा संताप  पाहून अधिकाऱ्यांनी ५ दिवसांत वीज जोडणी करू, असे आश्वासन दिल्याने त्यांनी आंदोलन स्थगित केले. यावेळी मोताळा तालुकाध्यक्ष यशवंतराव पाटील, माजी तालुकाध्यक्ष मनोहरराव नारखेडे, नीनाजी घनोकार, तालुका सरचिटणीस वैभव इंगळे, प्रभंजन पाटील, विशाल व्यवहारे, रामेश्वर  गव्हाड, विकास नागवे, स्वप्निल ठोंबरे, भागवत पहुणे, विष्णू  सपकाळ, प्रविण मोताळकर, सोपान इंगळे, सिद्दीक किलकिल, नितीन गवई, गणेश पाटील, गजानन माताळे, सोहम झाल्टे, अमोल  रुमाले, अमोल वाडे, संतोष जोहरी, गोपाल राजगुरे, मोहित भंडारी, संदीप  वणारे, हसन शाह यांच्यासह भाजपा पदाधिकारी व शेतकरी  उपस्थित होते.