टिप्परने वृद्ध महिलेला चिरडले! मलकापूर तालुक्यातील घटना
मलकापूर( बुलडाणा लाइव्ह वृत्त सेवा): मलकापूर तालुक्यातील माकनेर गावाजवळ टिप्परने रिव्हर्स मारतांना ७० वर्षीय वयोवृद्ध महिलेस चिरडल्याची घटना २६ जुलै रोजी दुपारी चार वाजेच्या सुमारास घडली. या अपघातात महिलेचा जागीच मृत्यू झाला.
याबाबत सविस्तर वृत्त असे की, एम. एच. २८ एबी. ७३६३ क्रमांकाचे टिप्पर मलकापूरच्या दिशेने येत होते. मात्र माकनेर येथे रस्त्यावर शालेय विद्यार्थ्यांची बस बंद पडली होती. त्यामुळे या रस्त्यावरुन टिप्पर समोर जाणे शक्य नसल्याने टिप्पर चालकाने मागे न पाहता निष्काळजीपणे आणि वेगाने टिप्पर मागे घेतले. याचवेळी झोपडपट्टीकडून गावाकडे येत असलेल्या सुशिलाबाई नामदेव शेळके (७०) वर्षे रा. माकनेर या महिलेस टिप्परने धडक देत अक्षरशः चिरडल्याने या महिलेचा जागीच मृत्यू झाला.
या घटनेची माहिती मिळताच ग्रामीण पोलीस स्टेशनचे पोलीस निरीक्षक एफ. सी. मिर्झा त्यांच्या सहकाऱ्यांसह घटनास्थळी दाखल झाले. पंचनामा करून मृतदेह शवविच्छेदनाकरिता मलकापूर उपजिल्हा रुग्णालय येथे पाठवण्यात आला.