याला म्हणतात प्रामाणिकपणा! रस्त्यात सापडलेली पाच लाख रुपयांची बॅग चक्क परत केली!!

त्याचे झाले असे, की हिवरा बुद्रूक येथील सहदेव घोराडे यांच्या मुलीचा विवाह २१ एप्रिलला पार पडला. २२ एप्रिलला खामगाव येथे स्वागत समारंभ झाला. त्यानंतर रात्री ते परिवारासह मॅक्झिमो गाडीने घरी हिवरा बुद्रूकला परतत असताना गाडीच्या टपावर ठेवलेली बॅग खाली पडली. बॅगमध्ये घोराडे यांच्या मुलीच्या लग्नातील काही कपडे, दागिने व रोख ९ हजार रुपये होते.

मध्यरात्री दीडच्या सुमारास खामगाव येथील तायडे कॉलनीतील गजानन सोळंके यांच्या घरी श्री गुरुदेव भजनाचा कार्यक्रम आटोपून घराकडे जात असलेल्या निमकवळा येथील बबलू राठोड, संतोष इंगळे, महादेव काकड, गोलू इंगळे यांना ती बॅग सापडली. त्यांनी ती बॅग घरी नेल्यानंतर उघडली असता त्यात सोन्याची पट्टा पोत, कानातले व रोख ९ हजार रुपये व काही मौल्यवान भेटवस्तू दिसल्या.

काही भेटवस्तूवर घोराडे यांच्या नावाचा उल्लेख असल्याने त्यांनी लगेच घोराडे परिवाराशी संपर्क करून बॅग सापडल्याचे सांगितले. त्यानंतर दुसऱ्या दिवशी हिवरा बुद्रूक येथील मारोती संस्थानमध्ये घेण्यात आलेल्या छोटेखानी कार्यक्रमात सापडलेली बॅग घारोडे यांच्या स्वाधीन करण्यात आली. घारोडे परिवाराने बबलू राठोड व त्यांच्या सहकाऱ्यांचा शाल व श्रीफळ देऊन सत्कार केला आणि आभार मानले. बबलू राठोड व त्यांच्या सहकाऱ्यांच्या प्रामाणिकपणाचे परिसरात कौतुक होत आहे.