पोहण्यासाठी विहिरीत उडी घेतलेला मुलगा बुडाला!; खामगाव तालुक्यातील घटना

शुभम अनिल इंगळे (रा. टाकळी तलाव) असे मृत्‍यू झालेल्या मुलाचे नाव आहे. तो १२ वीत होता. त्‍याचे आई-वडील मजुरीसाठी मुंबईला गेलेले असल्याने तो आजीकडे राहत होता. गावाशेजारील प्रभु तिजारे यांच्या शेतातील विहिरीत गावातील मुले रोज पोहण्यासाठी जातात. शुभमही मित्रांसोबत पोहायला जात होता.

३ एप्रिलला दुपारी त्‍याने विहिरीत पोहण्यासाठी उडी घेतली. मात्र बराच वेळ होऊनही वर आला नाही. त्‍यामुळे पोहणाऱ्या तरुणांनी त्‍याचा शोध सुरू केला. मात्र तो मिळून आला नाही. गावात ही माहिती मिळताच पिंपळगाव राजा पोलिसांना कळविण्यात आले. पोलिसांनी घटनास्‍थळी येऊन रात्री ८ च्या सुमारास ग्रामस्‍थांच्या मदतीने गळाच्या साह्याने शुभमचा शोध घेतला. तेव्हा गळाला अडकून मृतदेह वर आला.