शेगावात नगरपालिका प्रशासनाचा भोंगळ कारभार! नालीतील घाण पाणी मंदिराकडे जाणार्‍या रस्त्यावर.. भाविक संतप्त

 
शेगाव(ज्ञानेश्वर ताकोते:बुलडाणा लाइव्ह वृत्तसेवा) येथील नगरपालिकेच्या भोंगळ कारभारामुळे चक्क नगरपालिकेच्या समोरच आज, शनिवार १८ जून रोजी घाण पाणी मंदिराकडे जाणार्‍या रस्त्यावर पसरल्यामुळे भाविक संतप्त झालेले दिसत होते. महाराष्ट्रातील प्रमुख तीर्थक्षेत्र असलेल्या संत नगरी शेगाव शहरात श्री संत गजानन महाराजांच्या दर्शना निमित्त महाराष्ट्रातील कानाकोपऱ्यातून दररोज शेकडो भाविक बाहेरगावावरून  येतात.  मोठ्या श्रद्धेने येत असलेल्या भाविकांना शेगाव नगरपालिकेच्या कार्यालयासमोरच गांधी चौकामध्ये मंदिराकडे जाणार्‍या रस्त्यावर वाहत असलेल्या घाणपाण्यातूनच येजा करावी लागत होती. त्यामुळे श्रींच्या मंदिरात दर्शनासाठी पायी जाणार्‍या भाविकांना रस्त्यावर पसरलेल्या व साचलेल्या घाणयुक्त पाण्यातूनच मंदिराकडे जावे लागत असल्याने भाविकांच्या धार्मिक आस्थेला धक्का पोहोचल्याची प्रतिक्रिया अनेक भाविकांनी बोलून दाखविली.

 शेगाव येथील गांधी चौक परिसरात नगरपालिकेचे कार्यालय असून नगरपालिका कार्यालयाच्या हाकेच्या अंतरावरच नालीमध्ये कचरा साचून नाली मधील घाण व दुर्गंधीयुक्त पाणी आज ,१८  जून रोजी सकाळपासून रस्त्यावर येऊ लागले . त्यामुळे  परिसरात सर्वत्र नालीचे घाण युक्त पाणी जमा झाल्याने या ठिकाणी तलावाचे स्वरूप प्राप्त झाले होते.

नालीतील घाणयुक्त व दुर्गंधीयुक्त पाणी दुकानासमोरच असल्यामुळे दुकानदार सुद्धा त्रस्त झाले. शेगाव नगरपालिकेच्या प्रशासनाने या बाबीची दखल घेऊन त्वरित उपाययोजना करावी व भाविकांच्या धार्मिक श्रद्धेला धक्का पोहोचणार नाही याबाबत दक्ष असावे अशी मागणी भाविका कडून करण्यात येत आहे.