मोठी बातमी! जमते वाटते आता! मंत्रिमंडळ विस्ताराचा मुहूर्त ठरला म्हणत्यात; श्वेताताई महाले,संजय कुटे की संजय रायमुलकर?

     गेल्या वर्षी जून महिन्यात राज्यात सत्ता संघर्षाचे महानाट्य पार पडले. यात शेवटी एकनाथ शिंदेंनी बाजी मारली, हाती असलेले मंत्रीपद सोडून आधीच्या शिवसेनेतील अनेक मंत्री शिंदेच्या सोबत गेले. त्यामुळे पहिल्या मंत्रिमंडळ विस्तारात शिंदेंना त्यांच्या नावाचा विचार करावा लागला, त्यातून सुद्धा बच्चू कडू सारख्यांना वगळण्यात आले. दुसऱ्या मंत्रिमंडळ विस्तारात आपले जमेल असा विश्वास सध्या अनेक आमदारांना वाटतोय. मात्र मंत्रिमंडळाचा विस्तार करतांना शिवसेनेच्या कोट्यातील मंत्रिपदाचा विचार करतांना शिंदेंना काळजीपूर्वक निर्णय घ्यावा लागणार आहे. यात काही आमदार नाराज होणार नाही याकडे शिंदेंना लक्ष द्यावे लागेल.

  बुलडाणा जिल्ह्यात कुणाला संधी?

आधीच्या मंत्रिमंडळ विस्तारात बुलडाणा जिल्ह्याच्या वाट्याला भोपळा आला. संजय कुटे,आमदार श्र्वेताताई  महाले आणि शिंदेच्या शिवसेनेच्या कोट्यातून मेहकरचे आमदार संजय रायमूलकरांच्या नावाची  चर्चा होती. मात्र त्यावेळी कुणाचेही जमले नाही. जळगावच्या पालकमंत्री पदाची जबाबदारी सांभाळणाऱ्या गुलाबराव पाटलांकडे बुलडाण्याचा अतिरिक्त कारभार देण्यात आला. गुलाबराव पाटलांनी मात्र बुलडाण्याला सावत्रा सारखीच वागणूक दिल्याचा आरोप त्यांच्यावर होतोय. मात्र आता नव्याने होणाऱ्या मंत्रिमंडळ विस्तारकडे जिल्ह्याच्या नजरा लागल्या आहेत.  देवेंद्र फडणवीस मुख्यमंत्री असताना त्यांच्या मंत्रिमंडळात काम करणाऱ्या संजय कुटेंना संधी मिळते की महिला आमदार, आक्रमक नेतृत्व म्हणून आमदार श्वेताताईंना संधी मिळते हे पाहणे महत्वाचे ठरेल. तसे पाहता संजय कुटे आणि आमदार श्वेताताई दोघेही उपमुख्यमंत्री देवेंद्र फडणवीस यांच्या जवळचे आहेत, त्यामुळे देवेंद्र फडणवीस दोघांपैकी कुणाची निवड करतात ते महत्वाचे ठरेल. दुसरीकडे खासदार प्रतापराव जाधवांमुळे मेहकरातून ३ वेळा आमदारकी मिळवलेल्या आमदार संजय रायमुलकरांना यावेळी संधी मिळते का हे पाहणेही महत्वाचे ठरेल. तिकडे काहीही होवो..मात्र आता तरी जिल्ह्याला स्वतःचा हक्काचा पालकमंत्री मिळाला पाहिजे अशा भावना अनेकांडून व्यक्त होत आहेत.