पोलिसांचा ताण वाढणार! जिल्ह्यात महाविकास आघाडी करणार ठिकठिकाणी रास्तारोको;

 शासन आपल्या दारी कार्यक्रमासाठी शासनाने जय्यत तयारी केली आहे. काल विभागीय आयुक्त यांनी कार्यक्रमाच्या तयारीचा आढावा घेतला. खा.जाधव यांच्यासह  आमदार गायकवाड , आमदार रायमुलकर हे देखील नियोजनावर लक्ष ठेवून होते. कार्यक्रमासाठी लाभार्थ्यांना जिल्हाभरातून आणण्यासाठी साडेतीनशे बसेस बुक करण्यात आल्या आहेत. मात्र आता या बसेस कार्यक्रमस्थळी पोहचवण्याचे मोठे आव्हान पोलिसांसमोर असणार आहे. कारण मराठा आंदोलकांवर जालन्यात झालेल्या लाठीचार्ज च्या निषेधार्थ महाविकास आघाडी जिल्ह्यात ठिकठिकाणी रास्तारोको आंदोलन करणार आहे. कालच या रास्तारोकोची घोषणा झाल्याने पोलिसांसमोर ऐनवेळी मोठे आव्हान निर्माण झाले आहे.

 दरम्यान या रास्तारोकोत बुलडाण्याकडे जाणाऱ्या बसेस अडवण्याचा आंदोलकांचा प्लॅन असल्याची माहिती आहे. तसे झाले तर लाभार्थ्यांना कार्यक्रमस्थळी पोहचण्यासाठी अडचणी निर्माण होण्याची शक्यता आहे. आजच्या कार्यक्रमासाठी जिल्ह्याबाहेरून देखील पोलिसांची अतिरिक्त कुमक बोलावण्यात आली आहे, दंगाकाबु पथक देखील तैनात करण्यात आलेले आहे...मात्र असे असले तरी पोलिसांचा ताण वाढणार आहे...