महिला पोलिस अधिकारी प्रियंका गोरेंचे होतेय कौतुक! राहुल बोंद्रेना पोलीस ठाण्याच्या गेटवरच अडवले होते; म्हणाल्या, तुम्ही मला माझे काम करू द्या;

काँग्रेसचे जिल्हाध्यक्ष राहुल बोंद्रे काल, संध्याकाळी ७ च्या सुमारास बुलडाणा शहर पोलिस ठाण्यासमोर आले. त्यांनी पोलीस ठाण्यात जाण्याचा प्रयत्न केला, मात्र एपीआय गोरे यांनी राहुल बोंद्रे यांना पोलीस ठाण्यात जाण्यापासून रोखले. यावेळी बोंद्रे चांगलेच संतापले, मला पोलीस ठाण्यात जाण्यापासून तुम्ही कसे रोखू शकता?  हे तुमचे बरोबर नाही, तुमची हुकूमशाही सुरू आहे..मी आत जाणारच, हवे तर मला अटक करा, माझ्यावर गुन्हा दाखल करा असा युक्तिवाद बोंद्रे यांनी केला.

एकवेळ तर बोंद्रे यांनी आत जाण्याचा प्रयत्नही करून बघितला मात्र मी तुम्हाला आत जाऊ देणार नाहीच अशी भूमिका एपीआय गोरे यांनी घेतली. सहाय्यक पोलिस निरीक्षक निलेश लोधी हेसुद्धा यावेळी   पोलीस ठाण्यासमोर गेटवर होते. यावेळी राहुल बोंद्रे यांनी पोलिसांच्या भूमिकेचा निषेध केला, मात्र एपीआय गोरे यांनी सयंम ठेवून परिस्थिती हाताळली. मला वरिष्ठांचे आदेश आहेत, त्यामुळे मी तुम्हाला आत जाऊ देणार नाहीच अशी भूमिका एपीआय गोरे घेत होत्या.

अखेर शेवटी राहुल बोंद्रे यांना पोलीस ठाण्यासमोर ठिय्या आंदोलन करावे लागले.  सध्या महिला पोलीस अधिकारी एपीआय गोरे आणि राहुल बोंद्रे यांच्या पोलिस ठाण्याबाहेरील चर्चेचे व्हिडिओ व्हायरल होत असून नेटकरी एपीआय गोरे यांच्या धाडसाचे, भूमिकेचे कौतुक करीत आहेत. वरिष्ठ पोलीस अधिकाऱ्यांनी कुणाला आत न सोडण्याची घेतलेली भूमिका चूक की बरोबर ते बाजूला ठेवा मात्र वरिष्ठांच्या आदेशाचे पालन कसे करायचे असते.. कर्तव्यनिष्ठा यालाच म्हणतात, मैडम सैल्युट...अशा शब्दात नेटकरी एपीआय गोरे यांचे कौतुक करीत आहेत..!