आ.संजय गायकवाडांच्या विरोधात कोण ठोकणार शड्डू..? बुधवंत, तुपकर, शेळके, सपकाळ, सावळे, गोडे, शिंदे की दुसरच कुणी...कुणाचा मेळ जमणार...? कशी आहेत समीकरणे...

बुलडाणा(कृष्णा सपकाळ:बुलडाणा लाइव्ह वृत्तसेवा): लोकसभा निवडणुकीनंतर आता सर्वांच्या नजरा ३-४ महिन्यांवर येऊन ठेपलेल्या विधानसभा निवडणुकीकडे लागल्या आहेत. बुलडाणा लोकसभा मतदारसंघातील ६ विधानसभेच्या आमदारांना त्यांची जागा टिकवण्याचे आव्हान विधानसभा निवडणुकीत राहणार आहे. ६ पैकी केवळ दोनच आमदारांनी महायुतीचे उमेदवार प्रतापराव जाधव यांना चांगले मताधिक्य दिले. घाटावरच्या चारही मतदारसंघात प्रतापराव जाधव माघारलेले दिसले.विशेषत: बुलडाणा विधानसभा मतदारसंघात प्रतापराव जाधवांना मिळालेली २ हजार मतांची पिछाडी विरोधकांचा आत्मविश्वास दुणावणारी ठरली आहे, कारण प्रतापराव जाधव यांना सर्वाधिक लीड बुलडाणा विधानसभा मतदारसंघातून देऊ असा गाजावाजा आ.संजय गायकवाड यांनी केला होता. ना.प्रतापराव जाधव यांना लीड मिळू दिला नाही यापेक्षा आ.संजय गायकवाड यांना लीड मिळवून देता आला नाही याची जास्त खुशी आ.गायकवाड यांच्या विरोधकांना झाली असावी. कारण याच आकड्यांच्या आधारावर आ.गायकवाड यांच्याविरोधात विधासभेच्या आखाड्यात उतरण्याचा प्लॅन महाविकास आघाडी करणार आहे..आ. गायकवाडांच्या विरोधात उतरवण्यासाठी महाविकास आघाडीकडे अनेक पैलवान आहेत, मात्र मीच आखाड्यात उतरणार असा अट्टाहास या पैलवानांनी धरला तर मात्र महाविकास आघाडीत यादवी माजू शकते. सद्यस्थितीत महाविकास आघाडीतून शिवसेना या जागेवर पहिला अधिकार सांगत आहे. अशा स्थितीत शिवसेनेचे विद्यमान जिल्हाप्रमुख जालिंधर बुधवंत यांच्या उमेदवारीची जोरदार चर्चा आहे. जिल्ह्यात शिवसेनेत उभी फूट पडली तेव्हा जालिंधर बुधवंत यांनी जिल्ह्यात शिवसेना जिवंत ठेवली. विरोधात आ.संजय गायकवाड यांच्यासारखा तगडा पैलवान असतांना बुधवंत यांनी जोरदार किल्ला लढवला, किल्ला ढासळू तर दिलाच नाही तर उलट बाजार समिती आणि लोकसभा निवडणुकीत किल्ला आणखी मजबूत केला. त्यामुळे उमेदवारी मिळवण्याच्या या स्पर्धेत बुधवंत क्रमांक एकवर असल्याचे चित्र आहे. उबाठा शिवसेनेकडून डॉ.मधुसूदन सावळे यांचेही नाव चर्चेत आहे. दोन तीन वेळा जवळजवळ पोहचून उमेदवारीने हुलकावणी दिलेली असली तर डॉ.सावळे यांनी जनसंपर्क कमी पडू दिला नाही, अर्थात विधानसभा त्यांच्याही डोक्यात आहेच.त्यादृष्टीने डॉ.सावळे यांची तयारी सुरू आहे.