तुपकरांची आजची रात्र रुग्णालयातच!

सोयाबीन व कापूस उत्पादक शेतकऱ्यांच्या विविध मागण्यांसाठी त्‍यांनी १७ नोव्‍हेंबरपासून अन्‍नत्‍याग आंदोलन सुरू केले होते. आज पालकमंत्र्यांच्या मध्यस्‍थीनंतर आंदोलन मागे घेण्यात आले. तुपकरांना आज व उद्या केवळ द्रवस्वरूपातील पदार्थ देण्यात येणार आहेत. तब्येतीत सुधार झाल्यास २२ नोव्हेंबरला डिस्चार्ज मिळू शकतो, असे वैद्यकीय सूत्रांनी सांगितले. तुपकरांना उपचारासाठी दाखल करण्यात आले असले तरी त्यांच्याभोवती कार्यकर्त्यांचा व शेतकऱ्यांचा गराडा कायम आहे. आज दिवसभरात जिल्ह्यातल्या वेगवेगळ्या भागातून कार्यकर्ते तुपकरांना भेटण्यासाठी जिल्हा रुग्णालयात येत होते. कार्यकर्त्यांच्या गर्दीमुळे जिल्हा रुग्णालयात परिसरात पोलीस बंदोबस्त लावण्यात आला आहे.