संविधान जागर यात्रेला गावागावात मिळतोय उदंड प्रतिसाद! रायपुरच्या सभेत राहुल बोंद्रेंचे घणाघाती भाषण; म्हणाले, भाजपवाल्यांचे दिवस भरलेत;

  जिल्हा काँग्रेसचे अध्यक्ष राहुल बोंद्रे यांच्या संकल्पनेतून २७ जानेवारीपासून संविधान जागर यात्रा निघाली आहे. संविधानाची पालखी घेऊन ही यात्रा गावागावात जात आहे, पहिल्या टप्प्यात एकूण १०२ गावात ही यात्रा पोहचणार आहे. दोन दिवसांच्या विश्रांतीनंतर काल, ३ फेब्रुवारीला सहाव्या दिवसाच्या यात्रेला साखळी बु येथून सुरुवात झाली. त्यानंतर साखळी खु, पांगरी उबरहंडे, केसापुर, मातला, सिंदखेड, रायपुर, पळसखेड भट या गावांत यात्रेचे जोरदार स्वागत झाले. कालचा मुक्काम रायपूर येथे होता.

   लोकशाहीची लक्तरे वेशीवर टांगून काम...

   देशाला गुलामगीरीतून बाहेर पडायला १५० वर्षे लागली. अनेकांनी रक्त सांडल, अनेक क्रांतिकारकांना फासावर जाव लागलं तेव्हा कुठे आम्हाला स्वातंत्र्य मिळालं. डॉ.बाबासाहेबांनी आम्हाला घटना दिली आणि लोकशाही आमच्या देशात सुरू झाली. मात्र आता दिवसा ढवळ्या लोकशाहीची लक्तरे सत्ताधारी पक्षाकडून वेशीवर टांगण्यात येत आहे. केंद्रीय तपास यंत्रणा स्वायत्त संस्था असताना त्या आता सत्ताधाऱ्यांच्या हातचे बाहुले झाल्यात. जो कुणी भाजपच्या विरोधात बोलले त्याला इडी चा धाक दाखवल्या जातो असे राहुल बोंद्रे म्हणाले. चिखली विधानसभा मतदारसंघात देखील असच सुरू आहे, सरपंचाला गावाची कामे हवीत तर आधी भाजपमध्ये यायला सांगितले जाते. काहींना गुन्हे दाखल करण्याची धमकी दिल्या जाते. तरीही जर कुणी त्यांचे ऐकत नसेल तर खोटे गुन्हे दाखल केल्या जातात असे म्हणत राहुल बोंद्रे यांनी स्थानिक लोकप्रतिनिधींवर टीका केली.

आज यात्रेचा सातवा दिवस, मुक्काम दहिड खुर्द गावात..

 दरम्यान संविधान जागर यात्रेला आज,४ फेब्रुवारीला पिंपळगाव सराई येथून सुरुवात झाली. यात्रेचा आज सातवा दिवस आहे. ही यात्रा आज सैलानी, ढासाळवाडी, घाटनांद्रा, दुधा, देवपूर, अटकळ, दहिद खुर्द या गावात जाणार आहे. आजचा मुक्काम दहिद खुर्द गावात आहे.