सोयाबीन कापसाच्या भाववाढीसाठीचे आंदोलन पेटण्याची चिन्हे!
५ नोव्हेंबर पासून संत नगरी शेगावातून सुरू झालेली एल्गार रथयात्रा १६ नोव्हेंबरला मोताळा तालुक्यात दाखल झाली.हनवतखेड, गोतमारा, कोऱ्हाळा बाजार, खेडी, पान्हेरा, सारोळा मारोती, पोफळी, चावर्दा, पिंप्री गवळी, माकोडी - टेंभी, जहांगीरपूर, शेलगाव बाजार, सावरगाव, आव्हा, लिहा, पिंपळगाव देवी, धामणगाव बढे, सिंदखेड लपाली तर १७ नोव्हेंबरला किन्होळा, तपोवन, थळ, रोहिणखेड, उबाळखेड, नळकुंड, तांडा, दाभा, राहेरी, खामखेड, खडकी, मोहेगाव, राजूर, वाघजाळ, मोताळा (शहर), डीडोळा बु., घुस्सर बु., घुस्सर खुर्द, दाभाडी, तळणी, शेलापूर बु. शेलापूर खुर्द या गावांत एल्गार रथयात्रेला प्रचंड प्रतिसाद मिळाला.
सोयाबीन कापूस उत्पादक शेतकऱ्यांच्या एकजुटीची ताकद सरकारला दाखवून देऊ: रविकांत तुपकर
यंदा शेतकऱ्यांची परिस्थिती अतिशय बिकट आहे. अत्यल्प पावसामुळे उत्पादनात मोठी घट झाली असली तरी शेतकऱ्यांचा उत्पादन खर्च वाढला आहे. सोयाबीनचा एकरी खर्च ३६ हजार तर उत्पन्न केवळ १८ हजार आणि कापसाचा एकरी खर्च ४० हजार आणि उत्पन्न ३५ हजार अशी परिस्थिती आहे. सोयाबीनला किमान ९ हजार तर कापसाला १२ हजार भाव मिळाला पाहिजे ही आमची मागणी आहे. शेतकऱ्यांच्या मुलाबाळांच्या अंगावर यंदाच्या दिवाळीत नवीन कपडे नाहीत. मात्र असंवेदनशील सरकार सत्तेच्या मस्तीत गुंग आहे. गावगाड्यातला शेतकरी आता आपल्या हक्कांसाठी जागृत झाला आहे, त्यामुळे सरकारने शेतकऱ्यांना गृहीत धरू नये. सोयाबीन कापूस उत्पादक शेतकऱ्यांची ताकद सरकारला दाखवून देऊ आणि सरकारची मस्ती उतरवू असा इशारा रविकांत तुपकर यांनी एल्गार यात्रेदरम्यान धामणगाव बढे येथील सभेत सरकारला दिला. २० नोव्हेंबरला बुलडाण्यात होणाऱ्या एल्गार महामोर्चाला शेतकरी, शेतमजूर, शहरी नोकरदार वर्गाने मोठ्या संख्येने उपस्थित राहण्याचे आवाहन यावेळी तुपकर यांनी केले.