भक्ती महामार्गाविरोधात सोमवारी बुलडाण्यात आत्मक्लेष आंदोलन! शेतकऱ्यांना पाठिंबा देण्यासाठी आंदोलनात सहभागी व्हा; राहुल बोंद्रेंचे आवाहन; मुंबईत घेतली विरोधीपक्षनेत्यांची भेट...

प्रस्तावित सिंदखेडराजा शेगाव या भक्ती महामार्गासाठी शेतकऱ्यांच्या जमिनी अधिग्रहित होणार आहे. शेतकऱ्यांच्या पिकाऊ व कसदार जमीनी अधिग्रहित केल्यास जगाच्या पोशिंद्यावर उपासमारीची वेळ येणार आहे. सिंदखेड राजा ते शेगाव जाण्यासाठी अनेक पर्यायी मार्ग उपलब्ध आहेत. परंतु काही मिनिटे वाचविण्यासाठी शेतकऱ्यांच्या जमिनी अधिग्रहित होणे चुकीचे आहे. त्यामुळे, शेतकऱ्यांच्या न्याय हक्कासाठी हा महामार्ग रद्द करण्यात यावा या मागणीसाठी १ जुलै रोजी जिल्हाधिकारी कार्यालयासमोर आत्मक्लेष आंदोलन होत आहे. शेतकऱ्यांना पाठिंबा देण्यासाठी नागरिकांनी या आंदोलनात मोठ्या संख्येने सहभागी व्हावे, असे आवाहन काँग्रेस कमिटीचे जिल्हाध्यक्ष राहुल बोंद्रे यांनी केले.