देऊळगावमही, देऊळगावराजात संदीप शेळकेंचा भव्य रोड शो! देऊळगावराजा तालुक्याला सिड हब बनवणार; संदीप शेळकेंचे प्रतिपादन! म्हणाले, शेतकऱ्यांचे कल्याण झाले पाहिजे

देऊळगाव राजा:(बुलडाणा लाइव्ह वृत्तसेवा): संपूर्ण जगाचे पोषण करणाऱ्या शेतकऱ्यांवरील संकटे अजूनही कमी झालेली नाहीत. मागील दोन दिवसांपूर्वीच बुलढाणा जिल्ह्यात झालेल्या वादळी वाऱ्यासह, गारपिटीमुळे जिल्हाभरातील शेतकऱ्यांचे प्रचंड नुकसान झाले आहे. याआधीही शेतकऱ्यांवर संकटे होतीच आणि आताही आहेत. शेतमालाला भाव मिळत नाही, पिक विम्याचे पैसे पूर्ण शेतकऱ्यांपर्यंत पोहोचले नाहीत. त्यामुळे सद्यस्थितीत शेतकऱ्यांना आधार देणे अत्यंत गरजेचे झाले आहे. बुलढाणा जिल्ह्यात जवळपास पाच लाखांपेक्षा जास्त शेतकरी बांधव आहेत. त्यामुळे यंदाच्या लोकसभा निवडणुकीत जनतेने संधी दिली तर शेतकऱ्यांच्या हिताच्या कल्याणकारी योजना आपण राबवणार आहोत. शेतमालाला भाव मिळण्यासाठी विशेष प्रयत्न मी करणार आहे, जिल्ह्यात सिंचनाची टक्केवारी वाढली पाहिजे तसेच सिंदखेडराजा आणि देऊळगाव राजा तालुक्यात खाजगी कंपन्यांच्या सहयोगातून सीड हब आपण उभारणार आहोत.  शेतकऱ्यांचे कल्याण होईल असे कार्य  आपण करणार आहे. असे  प्रतिपादन वन बुलढाणा मिशनचे संकल्पक तथा बुलढाणा लोकसभेचे अपक्ष उमेदवार संदीप शेळके यांनी केले. आज १५ एप्रिलला देऊळगाव मही, देऊळगाव राजा  येथे त्यांच्या प्रचारार्थ भव्य रोडशो पार पडला. यादरम्यान जनतेशी संवाद साधताना ते बोलत होते.