खासदार जाधवांच्या बालेकिल्ल्यात आज नितीन बानगुडे पाटलांची तोफ धडाडणार! दुपारी सिंदखेडराजा, सायंकाळी राजेगाव व रात्री डोणगावात होणार जाहीर सभा; "होऊ द्या चर्चा"

केंद्र आणि राज्य सरकारच्या योजना बोलघेवड्या आहेत. जाहिरातींवर कोट्यवधी रुपये खर्च करणाऱ्या सरकारकडे शेतकऱ्यांचे अश्रू पुसण्यासाठी पैसे नाहीत. आरोग्य व्यवस्था सुधारण्यासाठी पैसे नाहीत. गृहखात्याच्या पुरता बोजवारा उडाला आहे, कुणालाही कायद्याचा धाक राहिलेला नाही. महिलांवरील अत्याचारांच्या घटना वाढत आहेत. बुलडाणा जिल्ह्यात घाटावर पुरेसा पाऊस नाही. वेळेवर पाऊस न पडल्याने दुष्काळ सदृश्य परिस्थिती आहे. मुख्यमंत्री "शासन आपल्या दारी" अभीयानासाठी जिल्ह्यात येऊन गेले पण दुष्काळावर त्यांनी चकार शब्द काढला नाही. गद्दारी करून सत्तेची फळे चाखणाऱ्या जिल्ह्यातल्या खासदार ,आमदारांना जिल्ह्यातल्या प्रश्नांशी देणेघेणे नाही, कारण आता थोडेच दिवस उरले आहेत असेही नरेंद्र खेडेकर "बुलडाणा लाइव्ह" शी बोलताना म्हणाले. होऊ द्या चर्चा या अभियानाच्या यशस्वीतेमुळे जिल्ह्यातल्या गद्दार नेत्यांच्या पायाखालची वाळू सरकली आहे असेही खेडेकर म्हणाले. होऊ द्या चर्चा या अभियानात मोठ्या संख्येने सहभागी होण्याचे आवाहन नरेंद्र खेडेकर यांनी केले.