महादेव जानकर रविकांत तुपकरांच्या भेटीला!

तुपकर माझे जवळचे मित्र आहेत. त्यांनी शेतकऱ्यांसाठी उभ्या केलेल्या आंदोलनाला यश मिळाले आहे. तुपकर चळवळीतले कार्यकर्ते आहेत. स्वतःच्या मुलाबाळांसाठी त्यांनी संघर्ष केला नाही. जनतेसाठी संघर्ष करतो त्याचा इतिहास लिहिला जातो, त्यातीलच एक रविकांत तुपकर आहे. त्यांच्या आंदोलनाला शुभेच्छा देण्यासाठी मी आलो आहे, असे जानकर म्हणाले. मूल रडल्याशिवाय आईसुद्धा पाजायला घेत नाही. पीक विमा कंपन्या सरकारला कशा लुटतात, ब्लॅकमेल करतात हे मला माहीत आहेत. आता शेतकऱ्यांनीही जागृत होण्याची गरज आहे. केवळ शेतीवर अवलंबून राहू नये.

शेतकऱ्याला तीन मुलं, मुली असतील तर एक कलेक्टर झाले पाहिजे. दुसऱ्याने उद्योजक तर तिसऱ्याने राष्ट्रीय समाज पक्षाचे खासदार,आमदार झाले पाहिजे, असे ते विनोदाने म्हणाले. शेतकऱ्यांच्या पोरांनीही व्यापार केला पाहिजे. दोनशे एकर शेती असून खायला नाही अशी शेतकऱ्यांची अवस्था असते. आधुनिक युगाचे राजकारण, अर्थकारण शेतकऱ्यांच्या मुलांनी केलं पाहिजे. हेलिकॉप्टर कसं बनवायचं ,नासामध्ये कशी एंट्री करायची हे शेतकऱ्यांच्या पोरांना जमलं पाहिजे. केवळ शेतीच्या भरवशावर राहू नका. उद्योजक व्हा, जोडधंदा करा. यामुळे पश्चिम महाराष्ट्रातील शेतकऱ्याची परिस्थिती सुधारत आहे. टॉपचे शिक्षण घ्या, असेही जानकर म्हणाले.

विदर्भातल्या नेत्यांना म्हणाले...
पश्चिम महाराष्ट्रातील  वेगवेगळ्या पक्षाचे नेते विकासासाठी निधी आणायला एका गाडीत जातात. मात्र इकडे ना तुला न्‌ मला घाल कुत्र्याला... अशी परिस्थिती आहे. ही प्रवृत्ती विदर्भातल्या आणि मराठवाड्यातल्या नेत्यांनी बदलली पाहिजे. आम्हा पश्चिम महाराष्ट्रातील नेत्यांमध्ये राजकारणात भांडणं होतात. पण विकासाला आम्ही कधीच विरोध करीत नाही. म्हणून विकासासाठी एकत्र या, असेही जानकार विदर्भातील नेत्यांना उद्देशून म्हणाले.