नरेंद्र खेडेकरांच्या प्रचारासाठी महाविकास आघाडीने कंबर कसली! जालिंधर बुधवतांच्या नेतृत्वात बुलडाणा तालुक्यात प्रचार दौरा; आ. धिरज लिंगाडे, जयश्रीताई शेळके, हर्षवर्धन सपकाळही जोमाने भिडले

"आम्ही निष्ठेचे शिलेदार" या टॅगलाईन खाली नरेंद्र खेडेकर यांचा प्रचार सुरू आहे. स्वतः पक्षप्रमुख उध्दव ठाकरे बुलडाणा लोकसभा मतदारसंघाच्या प्रचाराचा आढावा घेत आहेत. काँग्रेस, शिवसेना आणि शरद पवारांच्या नेतृत्वातील राष्ट्रवादी काँग्रेस खेडेकर यांच्या प्रचारासाठी एकदिलाने काम करीत असल्याचे चित्र आहे. माजी आमदार हर्षवर्धन सपकाळ, काँग्रेस नेत्या जयश्रीताई शेळके यांनी लोकसभेची उमेदवारी मिळावी यासाठी प्रयत्न केले होते हे खरे मात्र खेडकर यांना अधिकृत रित्या उमेदवारी जाहीर झाल्यानंतर आघाडीधर्माचे पालन या दोन्ही नेत्यांकडून होत आहे. एवढेच नव्हे तर नरेंद्र खेडकर यांच्या प्रचारासाठी स्वतंत्ररित्या दोन्ही नेते आपापले प्राबल्य क्षेत्र असलेल्या क्षेत्रात प्रचार करीत आहेत.

  काल बुलडाणा शहरातील सुंदरखेड भागात आ.धीरज लिंगाडे, जयश्रीताई शेळके यांनी खेडेकर यांच्या प्रचारासाठी रॅली काढली. घरोघरी जाऊन त्यांनी नरेंद्र  खेडेकर यांना विजयी करण्याचे आवाहन केले. शिवसेना जिल्हाप्रमुख जालिंधर बुधवंत यांनी बुलडाणा तालुक्यातील साखळी बु, अंत्री तेली, शिरपूर, पांगरी, साखळी खु, अजिसपूर, नांद्रा कोळी, सागवन, कोलवड, तांदुळवाडी, हतेडी बु , हतेडी खु, अंभोडा, झरी या गावांत रॅली काढून नरेंद्र खेडेकर यांना विजयी करण्याचे आवाहन केले.