बुलडाणा लोकसभा:पक्षांचे 'पंख' कमजोर!अपक्षाचा वाढणार जोर! ज्येष्ठ पत्रकार विजय देशमुख लिहीतात...यावेळची ही फक्त निवडणूक नाही,कर्मयुध्द आहे कर्मयुध्द... !

निवडणूका आल्यावरच प्रगट होणारे, सार्वजनिक क्षेत्रात संकुचित वावर असलेले ,लोकांना अपेक्षित नसलेले, लादले गेलेले उमेदवार निवडणूक मैदानात कोणता पराक्रम दाखवू शकतात? धनशक्ती विरूद्ध जनशक्ती अशा टिपीकल टैगलाईनच्या लढती आता दिसायला लागतील.जे भ्रमात आहेत,मस्तीत मश्गूल आहेत असे उमेदवार ही निवडणूक हलक्यात घेणार असतील तर यावेळी विश्रांतीचा योग त्यांना खुणावत आहे असेच म्हणता येईल.केवळ पक्षांचे निवडणूक चिन्ह पाहून मतपेटी भरण्याचे दिवस सरले आहेत.उमेदवार पाहून,त्याचे कर्तृत्व पाहूनच ईव्हीएम चे बटन दाबण्याची जाण आणि भान मतदारांना आहे.बसल्याजागी मतांची आकडेमोड करून विजयाची स्वप्ने पाहणारे मुंगेरीलाल ४ जूनला खाडकन जागे होतील.तात्पर्य,प्रबळ इच्छाशक्तीवर ,चिकाटीने लढणारा एखादा सामान्यातील अपक्ष उमेदवार हा प्रस्थापित उमेदवारांना धोबीपछाड देऊ शकेल अशी एकूण परिस्थिती दिसू लागली आहे.

 यावेळची ही फक्त निवडणूक नाही.कर्मयुध्द आहे कर्मयुध्द ! उमेदवारांना कार्यकर्तृत्वाचा लेखाजोखा मतदारांपुढे ठेवूनच मते मागावी लागतील. सक्षम अपक्ष उमेदवाराला ताकदीने लढण्यासाठी अनुकूल वातावरण आपसूकच तयार होऊ लागले आहे.यावेळी खासदार कोण हवंय!आणि कोण कोण नकोय! यावरच आतापासून लोकांत चर्चिले जात आहे.निवडणूकीला रंग भरण्यास अवकाश असला तरी लोकभावना अपक्षाचा सूर आळवत आहे.प्रचारकी मेळावे हे फक्त देखावेच ठरण्याची शक्यता आहे.लोकांच्या मनात काय चालले आहे? याचा वेध कोण घेईल? सुरूवातीलाच अर्धी लढाई हरलेल्यांनी हा सतर्कतेचा इशारा समजावा.तूर्त एवढेच.