खासदार जाधवांच्या एन्ट्रीने अनेक पदाधिकाऱ्यांवर जुन्या पोस्ट डिलीट करण्याची पाळी! काही दिवसांपूर्वी म्हणाले होते, निम का पत्ता कडवा है..! आता म्हणतात, तुम्ही बांधाल तेच तोरण..!!

हल्लीच्या राजकारणात विचारांपेक्षा , तत्वांपेक्षा व्यक्तीपूजेला जरा जास्तच महत्व दिल्या जात असल्याचे चित्र आहे. राजकीय महत्वाकांक्षा असणारे लोक राजकारणात "गॉडफादर" शिवाय वावरत नाहीत. त्यामुळे विचार, तत्व, निष्ठा या केवळ भाषणातल्या पोकळ गोष्टी झाल्यात. नेता (गॉडफादर) म्हणेल ती पुर्वदिशा अशी अलीकडच्या राजकारणातील कार्यकर्त्यांची अन् नेत्यांनी नियुक्त केलेल्या पदाधिकाऱ्यांची दशा (दुर्दशा?)झालीय. त्यामुळे नेत्याने भूमिका बदलली की कार्यकर्ते सुद्धा भूमिका बदलतात. 

पूर्वी कार्यकर्त्यांचा विचार घेऊन सल्लामसलत करून नेते आपली भूमिका ठरवायचे आता आधी भूमिका घ्यायची अन् नंतर कार्यकर्त्यांना सांगायचे अशी पद्धत रूढ झालीय..! बर ते जाऊद्या..मुद्दा असा आहे की, हिंदुत्वासाठी आणि मतदारसंघातील लोकांची अधिक गतीने सेवा करण्यासाठी खासदार प्रतापराव जाधव आता शिंदेगटात गेले आहेत. खासदार प्रतापराव जाधवांचे जिल्ह्यातील समर्थक काही दिवसांपासून संभ्रमात होते,तो संभ्रम आता दूर झालाय..

पण खासदार साहेबांनी कार्यकर्त्यांना जर आधीच आपली स्पष्ट भूमिका सांगितली असती तर कार्यकर्त्यांनी "निम का पत्ता कडवा है" च्या घोषणा दिल्या नसत्या अन् शिंदेसोबत गेलेल्या आमदारांना गद्दार म्हटले नसते! आता शिवसेनेच्या नव्हे खासदार साहेबांचे निष्ठावंत कार्यकर्ते असणाऱ्या त्या बिचाऱ्या कार्यकर्त्यांवर जुन्या पोस्ट डिलीट करण्याची नामुष्की ओढवलीय एवढं मात्र खरय..!!