अखेर महाविकास आघाडीतून 'स्वाभिमानी' बाहेर! बुलडाण्यात रविकांत तुपकर स्वबळावर लढणार?

काही दिवसांपूर्वी राजू शेट्टी बुलडाण्यात आले तेव्हा आम्ही सर्वच पक्षांसोबत युती करून पोळून निघालो आहोत, असे विधान केले होते. त्यामुळे स्वाभिमानी आता यापुढील निवडणुका स्वबळावरच लढेल, असे अंदाज वर्तवले जात आहे. पंजाब आणि दिल्लीत आम आदमी पार्टीने जसा सक्षम पर्याय उपलब्ध करून दिला, तसा महाराष्ट्रातील जनतेला स्वाभिमानी शेतकरी संघटना पर्याय उपलब्ध करून देईल, असे विधान काही दिवसांपूर्वी रविकांत तुपकर यांनी केले होते.

याशिवाय रविकांत तुपकर ठरवतील त्या मतदारसंघातून निवडणूक लढवतील आणि स्वाभिमानी शेतकरी संघटना त्यांच्या पाठीशी भक्कमपणे उभी राहील, अशी घोषणा राजू शेट्टी यांनी केली होती. यापूर्वी युती आणि आघाडीत असताना जागा वाटपाच्या तिढ्यामुळे तुपकरांना तयारी करूनही निवडणुकीपासून वंचित रहावे लागले होते. आता महाविकास आघाडीतून बाहेर पडल्याने तुपकरांचे मैदानात उतरणे कन्फर्म झाल्याचे बोलले जात आहे.