नियमित कर्जफेड करणाऱ्या शेतकऱ्यांना प्रोत्साहन अनुदान देउन शिंदे फडणविस सरकारने शब्द पाळला: आमदार श्वेताताईंचे प्रतिपादन

काल, २० ऑक्टोबरला नियमित कर्जफेड करणाऱ्या राज्यभरातील शेतकऱ्यांच्या खात्यात प्रोत्साहन अनुदान जमा करण्याचा ऑनलाईन कार्यक्रम मुख्यमंत्री ना. एकनाथ शिंदे आणि उपमुख्यमंत्री देवेंद्र फडणवीस यांच्या हस्ते करण्यात आला. या ऑनलाईन कार्यक्रमासाठी प्रत्येक जिल्ह्याच्या जिल्हाधिकारी कार्यालयात पात्र शेतकऱ्यांना आमंत्रित करण्यात आले होते. बुलडाणा जिल्ह्यातील प्रत्येक तालुक्यातील पात्र शेतकऱ्यांना सुद्धा या प्रोत्साहित करणाऱ्या कार्यक्रमासाठी आमंत्रित करण्यात आले होते. त्यावेळी आ. सौ. श्वेताताई महाले बोलत होत्या. 

बुलडाणा जिल्ह्यातील २१ हजार ६०० शेतकऱ्यांना मिळणार लाभ

नियमित कर्जफेड करणाऱ्या शेतकऱ्यांना या प्रोत्साहन अनुदान योजनेचा बुलडाणा जिल्ह्यातील २१ हजार ६०० शेतकऱ्यांना लाभ मिळणार आहे.चिखली विधानसभा मतदार संघातील चिखली तालुक्यातील १८३४तर बुलडाणा तालुक्यातील १८५० शेतकऱ्यांना प्रोत्साहन अनुदान मिळणार आहे. आज पहिल्या दिवशी पहिल्या टप्प्यात जिल्हा भरातील ३००१ तर चिखली तालुक्यातील २४९ आणि बुलडाणा तालुक्यांतील ३७० शेतकऱ्यांच्या खात्यात प्रोत्साहन अनुदान जमा झाले आहे.
जिल्हाधिकारी कार्यालयात झालेल्या या कार्यक्रमात नियमित कर्जफेड करणाऱ्या पद्मनाभ जगदेराव बाहेकार , संदिप प्रकाश बाहेकर, सुभाष किसनराव वानखेडे, रामदास आत्माराम वानखेडे या शेतकऱ्यांचा सत्कार करण्यात आला. 

 यावेळी नवनियुक्त जिल्हाधिकारी एच. पी. तुम्मोड, दिनेश गीते, नरेश हेड़ाऊ, संगमेश्वर बदनाळे, विक्रम पठारे, जिल्हा बँकेचे अशोक खरात, भाजपचे तालुकाध्यक्ष सुनील देशमुख,ॲड. मोहन पवार, प्रकाश पाटील पडोळ,अरविंद होंडे, मंदार बाहेकर तथा जिल्हाभरातील प्रोत्साहन अनुदान योजनेतील पात्र लाभार्थी शेतकरी उपस्थीत होते.