संग्रामपूर, मोताळा नगरपंचायत निवडणूक : अध्यक्षपदासाठी दोन्ही ठिकाणी प्रत्येकी दोनच अर्ज! सहलीवरील सदस्य थेट १४ फेब्रुवारीलाच अवतरणार!!

बुलडाणा लाइव्हच्या ७ फेब्रुवारीच्या वृत्तात अध्यक्षपद निवडीला मर्यादा असल्याने सदस्यांचा फोकस उपाध्यक्ष पदावर असल्याचे नमूद करण्यात आले होते. त्या भाकीत प्रमाणेच उपाध्यक्ष पदासाठी  प्रहार व काँग्रेसमधील इच्छुकांची संख्या वाढली आहे. दोन्ही ठिकाणी दोन्ही राजकीय गटांना एकच स्वीकृत सदस्य मिळणार आहे. त्यामुळे वाट्यावर एकच स्वीकृतचे पद असल्याने सदस्यांनी आपल्या समर्थकांची, कार्यकर्त्यांची वर्णी लावण्यासाठी दबाव वाढवला आहे. परिणामी आज दोन्ही ठिकाणी प्रत्येकी दोनच अर्ज सादर करण्यात आले. संग्रामपूरमध्ये प्रहारतर्फे उषा सोनोने तर आघाडीतर्फे भारत बावस्कर यांनी अर्ज दाखल केले असून ते वैध ठरले. मोताळामध्ये माधुरी देशमुख (काँग्रेस) तर शिवसेनेतर्फे गणेश पाटील यांनी अर्ज दाखल केले. हे दोन्ही अर्ज वैध ठरले आहेत. यापूर्वी दगाफटका नको म्हणून काँग्रेस व प्रहारचे 12 सदस्य काही दिवसांपूर्वीच सहलीवर रवाना झाले. या तीर्थाटनदरम्यानच वाटाघाटी, तडजोड, नाराजी दूर करणे या घडामोडी घडत आहेत.