GROUND REPORT! भारत जोडो यात्रेच्या स्वागतासाठी संतनगरी सजली; जाहीर सभेला राहुल गांधी करणार संबोधित; ५ लाखांच्यावर नागरिकांची गर्दी अन् १९ एकराचे मैदान! वाचा कसे आहे नियोजन..

 अकोला जिल्ह्यातील बाळापूर मार्गे ही यात्रा शेगावात दाखल होईल. १८ नोव्हेंबरला दुपारचे जेवण वरखेड बुद्रुक येथे होईल. त्याच ठिकाणी वारकऱ्यांकडून भव्य रिंगण सोहळ्याचे आयोजन करण्यात आले आहे. स्वतः खा.राहुल गांधी या रिंगण सोहळ्यात सहभागी होणार आहेत. दुपारी ४ च्या सुमारास ही यात्रा शेगावात दाखल होईल.बाळापूर मार्गावरील स्काय वॉक जवळील शेतात जाहीर सभा होईल. सभेपूर्वी खा. राहुल गांधी हे श्री संत गजानन महाराजांचे दर्शन घेण्यासाठी जातील. रात्री शेगावात मुक्कामी राहिल्यानंतर दुसऱ्या दिवशी सकाळी ६ ला यात्रा पुढच्या प्रवासासाठी मार्गस्थ होणार आहे.

 भव्य नियोजन..

दरम्यान या यात्रेच्या नियोजनासाठी जिल्हाध्यक्ष राहुल बोंद्रे यांच्या नेतृत्वात आमदार राजेश एकडे,  काँग्रेस नेते ज्ञानेश्वर दादा पाटील, माजी आमदार दिलीपकुमार सानंदा, राम विजय बुरुंगले, स्वाती वाकेकर, जयश्रीताई शेळके, जिल्हा उपाध्यक्ष शैलेंद्र पाटील, शेगाव शहर अध्यक्ष  किरणबापु देशमुख , डॉ. जयवंतराव खेडेकर यांच्यासह, जिल्ह्यातील तालुका अध्यक्ष, पदाधिकारी व कार्यकर्त्यांचे बैठकांचे सत्र सुरू आहे.
शेगावात होणारी ही सभा महाराष्ट्रातील सर्वात मोठी सभा असणार आहे. ५ लाखांच्यावर ही सभा होणार असल्याने तब्बल १९ एकर जमिनीवर या सभेची तयारी सुरू आहे. सभेनंतर खा. राहुल गांधी शेगावातील स्व. गजानन दादा पाटील मार्केट यार्ड येथील मैदानात मुक्काम करणार आहेत.