भारत जोडो यात्रेत आज सांस्कृतिक कार्यक्रमांची रेलचेल! आजचा मुक्काम निमखेडीतच; राहुल गांधीचा आजचा मुक्काम छत्रपती संभाजीनगरात; उद्या सकाळी पुन्हा निमखेडीत दाखल होणार..

खा. राहुल गांधींच्या भारत जोडो यात्रेला महाराष्ट्रात प्रचंड प्रतिसाद मिळाला. पूर्वनियोजित कार्यक्रमानुसार काल,२० नोव्हेंबरला महाराष्ट्रातील शेवटचा दिवस होता, कालच यात्रा मध्यप्रदेशात जाऊन मुक्कामी थांबणार होती. मात्र खा. राहुल गांधींना गुजरात विधानसभा निवडणुकीच्या प्रचारासाठी जायचे असल्याने यात्रेचा महाराष्ट्रातील मुक्काम वाढवण्यात आला. बुलडाण्याचे माजी आमदार हर्षवर्धन सपकाळ व त्यांच्या सहकाऱ्यांनी प्रचंड मेहनत घेत निमखेड येथे तातडीची मुक्कामाची व्यवस्था उभारली व एक हेलिपॅड देखील तयार करण्यात आले.

दरम्यान कालचे नियोजित कार्यक्रम आटोपल्यानंतर खा. राहुल गांधी यांच्यासह यात्रेकरुंनी निमखेडी येथे मुक्काम केला. आज, २१ नोव्हेंबरला खा. राहुल गांधी हेलिकॉप्टरने छत्रपती संभाजीनगरला जातील. तेथून खाजगी विमानाने गुजरात विधानसभा निवडणुकीच्या प्रचारासाठी जातील. तिथल्या सभा आटोपल्यानंतर ते पुन्हा संध्याकाळी छत्रपती संभाजीनगर दाखल होणार आहे.  त्यांचा आजचा मुक्कामही छत्रपती संभाजीनगरात होणार असून  उद्या २२ नोव्हेंबरला हेलिकॉप्टरने ते निमखेडी येथे परत येतील. त्यानंतर यात्रा पुन्हा नियोजित मार्गाने मार्गस्थ होईल.