BULDANA LIVE EXCLUSIVE निसर्गाला आव्हान करून पावसाळ्यात इलेक्शन घ्यायचं म्हणताय? गत वर्षात झालता ११३ टक्के पाऊस! वाचा बुलडाणा लाइव्हचा स्पेशल पोस्टमार्टम रिपोर्ट; "घेता का चॅलेंज?"

जिल्ह्याचे वार्षिक पर्जन्यमान ७६१.६  मिमी इतके असून  सन २०२०- २१ मध्ये ६९२ मिमी पावसाने हजेरी लावली होती. सन  २०२१-२२ मध्ये  ७६४ (१००.३६ टक्के) पावसाची नोंद झाली होती. बुलडाणा, चिखली, देऊळगाव राजा, सिंदखेडराजा, लोणार, मेहकर, खामगाव या  तालुक्यात १०२ ते १३५ टक्के दरम्यान इतका धोधो पाऊस झाला. उर्वरित ६तालुक्यात ७५  ते ९४ टक्के पावसाची नोंद झाली होती.  हा केवळ नियमित  म्हणजे जून ते सप्टेंबर दरम्यान झालेला पाऊस होता.

४ तालुके हजारावर!

ऑक्टोबर पर्यंत पावसाची टक्केवारी ११३ टक्के झाली ! यामुळे सेंच्युरी गाठणाऱ्या वरील तालुक्यातील पावसाची टक्केवारी ११२ते १५० टक्के दरम्यान गेली.  उर्वरित तालुके शंभर टक्केच्या  घरात  पोहोचले. बुलडाणा ( १०५६मिमी) , सिंदखेडराजा ( १०४५ मिमी) , लोणार( १११८मिमी) व मेहकर ( १२५१मिमी) या तालुक्यांनी आजवरचे सर्व रेकॉर्ड धुवून काढले! ...

 अन... माहेवरी हिशोब!

दुसरीकडे जिल्ह्यातील पाऊस जूनपासूनच बरसायला सुरुवात करतो हे विशेष. मागील वर्षी जून महिन्याच्या सरासरी १३९ मिमीच्या तुलनेत १८३ मिमी म्हणजे १३१ टक्के पावसाने हजेरी लावली होती. जुलै च्या १९२ सरासरीच्या तुलनेत १९० मिमी,    ऑगस्टच्या २०७ मिमीच्या तुलनेत १३९ मिमी म्हणजे ६८ टक्के पाऊस झाला. सप्टेंबर ची सरासरी १२०  मिमी इतकी असून जिल्ह्यात २८१ मिमी म्हणजे २३३ टक्के पावसाची नोंद झाली होती. 
 
बोला घेता मग चॅलेंज?

आता पावसाचे अन पावसाळ्याचे हे नुसते आकडे आहेत. पूर, वीज पडणे, घरं कोसळणे, प्राणहानी, संपर्क तुटणे हे पराक्रम वेगळेच. चार महिने चालणारी खरीप हंगामाची धामधूम स्वतंत्र अध्याय ठरावा. यामुळे आता मोठ्या सायबानी ठरवावे, की पावसाशी खेटे घेत  पावसाळ्यात (विलक्षण) इलेक्शन घ्यायचे की नाय?        मोठ्यांच्या नादात लहानांनी पडू नये अशी रीत राहते. त्याच पालन केलेले बरं, नाही का ? ...