बुलडाण्यात भाजपच्या पदवीधर संवाद मेळाव्याला पदवीधर कमी अन् पक्षाचे कार्यकर्तेच जास्त; संवाद मेळाव्यात संवाद झालाच नाही! नेत्यांचीच एकतर्फी भाषणे; भाजपच्या प्रचारात पदवीधर मतदार बेदखल..!
विधानपरिषदेच्या अमरावती विभागीय पदवीधर मतदारसंघासाठी ३० जानेवारीला मतदान होणार आहे. महाविकासआघाडीच्या वतीने कांग्रेसकडून धीरज लिंगाडे तर भाजपच्या तिकिटावर १२ वर्षांपासून आमदारकीचा उपभोग घेणारे रणजित पाटील मैदानात आहेत. १२ वर्षांतील जास्तीत जास्त काळ सत्तेत आणि त्यातही मंत्रीपद असताना पदवीधरांकडे केलेले दुर्लक्ष यंदाच्या निवडणुकीत रणजित पाटलांच्या अंगलट येण्याची चिन्हे आहेत. त्यामुळे तशी चिन्हे दिसताच आता रणजित पाटीलही प्रचारासाठी धावपळ करतांना दिसत आहेत. मात्र असे असले तरी ज्यांची मते मिळवण्यासाठी हा प्रचार आहे ते पदवीधर मतदारच भाजपच्या प्रचारात बेदखल असल्याचे चित्र आहे.
बैठकांना, मेळाव्याला पदवीधर मतदार कमी अन सायबांचे कार्यकर्ते जास्त असेच सगळीकडे चित्र आहे. आज, २२ जानेवारीला झालेल्या बुलडाणा येथील पदवीधरांच्या संवाद मेळाव्यातही वेगळे चित्र नव्हते. मेळाव्याला जवळपास ४०० जणांची उपस्थिती होती. मात्र त्यातील बहुतांश पक्षाचे पदाधिकारी किंवा कार्यकर्तेच होते. उपस्थितांमध्ये पदवीधर मतदारांची संख्या मात्र कमी असल्याचे दिसले.