राजपूत - मराठा समाज वेगळे दाखविण्याचा चिखलीच्या एका राजकीय कुटुंबाचा प्रयत्न! "भाऊच्या" चिथावणीवरून आपसात नका करू वाद!

बहुजन समाजातीलच संगीताताई पांढरे यांच्या नावाने प्रेस नोट काढून बहुजन समाजातील श्र्वेताताई विरुद्ध आरोप करायचे तर कधी बहुजन समाजातील संगीताताई पाटील यांना खोटेनाटे सांगून बहुजन समाजातील महिलेविरुद्ध  भडकवायचे असे प्रकार सराईत गुन्हेगाराप्रमाणे करण्यात येत असल्याचा आरोपही बाळासाहेब खेडेकर यांनी प्रसिध्दी पत्रकाद्वारे केला आहे.  संगीता गाडेकर आणि विजय वाळेकर यांच्यातील वाद कसे वाढत राहील यासाठी काही जण जाणूनबुजन प्रयत्न करीत असल्याचा आरोप बाळासाहेब खेडेकर यांनी केला.

एकमेकांच्या अंगावर केसेस दाखल झाल्यानंतर पोलीस स्टेशन आणि कोर्टाच्या चकरा कुटुंबियांनाच माराव्या लागतील हे लक्षात घ्या. त्यामुळे कुणाच्या चिथावणीला बळी न पडता लोकशाही मार्गाने प्रश्न सोडवा असेही बाळासाहेब खेडेकर यांनी म्हटले आहे. राजपूत आणि मराठा समाजात वाद लावण्याचे प्रयत्न काहीजण करीत आहेत. १९७०- १९८० च्या दशकापर्यंत राजपूत मराठा असा भेद चिखली तालुक्यात कधीच नव्हता . सर्व मराठ्यांचे मूळ शोधले तर सर्वच मराठे हे क्षत्रिय राजपूत आहेत.

मेऱ्याच्या पडघान परिवारातील अनेक मुली राजपूत कुटुंबात त्या काळात देण्यात आल्या. रोटी बेटी व्यवहारचे हे प्रमाण वाढत जाणे गरजेचे असतांना  चिखलीतील  एका कुटुंबाने जाणीवपूर्वक राजपूत आणि मराठा कसे वेगळे आहेत हे दाखवण्याचा प्रयत्न केल्याचे बाळासाहेब खेडेकर यांनी म्हटले आहे. त्यामुळे समजाच्या प्रगतीसाठी आणि एकजुटीसाठी रोटी - बेटी व्यवहार गरजेचे असल्याचे बाळासाहेब खेडेकर यांनी म्हटले आहे. निवडणुका दोन दिवस चालतील. त्यानंतर रोज एकमेकांचा चेहरा बघणेच आहे. त्यामुळे कुण्या "भाऊंच्या" नादाला लागून वाद वाढविण्यापेक्षा एकमेकांच्या सुखदुःखात सहभागी व्हा , एकमेकांना मदत करा असा सल्लाही बाळासाहेब खेडेकर यांनी बहुजन समाजाला दिला आहे.