५ पैकी ३ कृषी उत्पन्न बाजार समित्यांवर महाविकासआघाडीचा झेंडा!

  संपूर्ण जिल्ह्याचे लक्ष लागून असलेली बुलडाणा कृषी उत्पन्न बाजार समितीची निवडणूक चुरशीची ठरली. महाविकास आघाडीची एकजूट इथे आ. संजय गायकवाडांच्या नेतृत्वातील शिवसेना - भाजपच्या पॅनलवर वरचढ ठरली. रात्री उशिरा जाहीर झालेल्या निकालात  महाविकास आघाडीला १२ तर शिंदेची शिवसेना आणि भाजपला ६ जागा मिळाल्या, त्यामुळे पुन्हा एकदा कृषी उत्पन्न बाजार समितीवर बुधवंत राज पहायला मिळणार आहे. देऊळगाव राजा कृषी उत्पन्न बाजार समितीच्या निवडणुकीत डॉ. राजेंद्र शिंगणे यांच्या सहकारातील वर्चस्वावर पुन्हा एकदा शिक्कामोर्तब झाले. १८ पैकी १५ जागांवर महाविकास आघाडीचे पॅनल विजयी ठरले तर ३ जागा भाजप - सेना युतीला मिळाल्या. 

 खामगावात सानंदांना आनंद..

खामगाव कृषी उत्पन्न बाजार समितीच्या निवडणुकीत माजी आमदार सानंदा यांनी त्यांचा गड शाबूत ठेवला. आमदार आकाश फुंडकर यांनी बाजार समिती ताब्यात घेण्यासाठी केलेल्या प्रयत्नांना मात्र यश मिळाले नाही. १८ पैकी १५ जागांवर महाविकास आघाडी तर ३ जागांवर भाजपचे उमेदवार विजयी झाले. कृषी उत्पन्न बाजार समितीच्या निवडणुकीच्या निमित्ताने सध्या सत्तेपासून दूर असलेल्या सानंदांना दिलासा मिळाला आहे.
    
मलकापुरात संचेतींना चैन -सुखाचे दिवस..!

   मलकापूर कृषी उत्पन्न बाजार समितीची निवडणूक एकतर्फी झाली.   राष्ट्रवादी काँग्रेस, काँग्रेसची सत्ता  उलथवून लावत माजी आमदार चैनसुख संचेती यांनी भाजप - शिवसेनेचा झेंडा फडकवला. १५ वर्षांपासून इथल्या बाजार समितीवर राष्ट्रवादी काँग्रेसचे वर्चस्व होते, ते आता संपुष्टात आले आहे. भाजप शिवसेनेच्या पॅनलला १६ तर विरोधकांना २ जागा मिळाल्या.