चक्क पोलिसांवरच पाळत ठेवत वाळू माफियांची लाईन क्लिअर करत होते, पोलिसांनी 'त्या' दोघांना उचलुन आणले!

पोलीस व महसूल यंत्रणा वाळू माफियांच्या वाहनावर कारवाई करण्याआधीच त्यांना सुगावा लागत असल्याने त्याच्यावर कारवाई करण्यात पोलीस व महसूल अधिकाऱ्यांना अडचणी निर्माण होतात. पोलीस, महसूल अधिकारी कारवाई करण्याआधीच वाळु माफिया पसार होऊन जातात. या वाळू माफियांचे खबरी चक्क पोलीस व महसूल अधिकारी यांच्यावर पाळत ठेवून त्यांना पोलीस व महसूल अधिकारी यांची माहिती पुरवत असतात. याप्रकरणी आज ९ मे रोजी जलंब रस्त्यावरील वाडी (खामगाव) जवळच्या पुलाजवळ मध्यरात्री १ वाजताच्या दरम्यान अक्षय श्रीराम तांबटकर (३०), मोहन प्रीतम धोटे (३१) दोघे रा. माटरगाव हे पोलिसांना संशयास्पद फिरताना दिसून आले. दोघेही वाळू तस्करी करणाऱ्यांना पोलिसांची व महसूल विभागाच्या कर्मचाऱ्यांची माहिती पुरवत असल्याच्या संशयावरून खामगाव शहर पोलिसांनी दोघांना ताब्यात घेतले व सूचनापत्र देऊन सोडून दिले आहे.पुढील तपास पोहेकॉ गजानन पाटील करीत आहेत.