सायेब.. एकटी मीच वाचले, त्या दोघी जागेवरच गेल्या हो! एखादा स्फोट होतो तसा आवाज झाला सायेब, दोघी ड्रायव्हर साईटला बसल्या होत्या मी कंडक्टर साईटला होते!

    
 शोभाबाई वाठोरे या मूळच्या लोणी गवळी येथील राहणाऱ्या आहेत. सध्या त्या मुलांसोबत पुण्यात राहतात आणि मजुरीकाम करून उदरनिर्वाह करतात. उद्या,२४ मे ला त्यांच्या मोठ्या बहिणीच्या नातीचे राजेगावला लग्न आहे, त्यासाठी त्या त्यांच्या मोठ्या बहिणीची मुलगी गोकर्णा रामदास खिल्लारे(४५, रा. केळवद, बुलडाणा) व वहिनी वनमाला किशोर पवार(३०, बेलगांव,वाशिम) यांच्यासोबत  पुण्यातल्या वाकोडीवाडी वरून बस मध्ये बसल्या होत्या. त्यांनी सुलतानपुरचे तिकीट काढलेले होते. सुलतानपुरला उतरल्यानंतर त्या राजेगावला जाणार होत्या. 

   बंधी बस चिरली..

"गोकर्णा अन् वनमाला  दोघी ड्रायव्हर साईटला अन् मी कंडक्टर साईटला होते सायेब..सकाळी ६ वाजता स्फोट व्हतो तसा आवाज झाला, ड्रायव्हर साईट ची बंधी बस चिरली..मी एकटी वाचले पण त्या दोघी जागेवरच गेल्या सायेब..." असे शोभाबाई हुंदका आवरत सांगत होत्या.. त्या गावातले लोक लवकर मदतीले धावले, कोणीतरी मले बस मधून बाहेर काढंल..ड्रायव्हर साईटच्या बंध्या काचा गीचा फुटल्या व्हत्या..मीच जोरजोरात ओरडत ओरडत व्हते..पण ज्यांना जास्त लागलं त्यांच्या तोंडून शब्द बी निघत नव्हता.. अंबुलन्स, पोलिस, डॉक्टर लवकर आले असते तर काही वाचले असते.." असेही शोभाबाई म्हणाल्या..! शोभाबाईंच्या तोंडाला आणि गुडघ्याला मार लागलेला असून त्यांच्या सिंदखेडराजा येथील ग्रामीण रुग्णालयात उपचार सुरू आहेत.