"सर मी पाणी प्यायला उठलो अन् तेवढ्यात..."मेहकर तालुक्यातील भालेगावचा योगेश काचा फोडून बसच्या बाहेर पडला..!

   
मूळचा मेहकर तालुक्यातील भालेगाव येथील असलेला योगेश एका कंपनीत छत्रपती संभाजी नगरात नोकरीला आहे. कंपनीच्या कामासाठी तो त्याचा कंपनीतील सहकारी मित्र साईनाथ पवार(१९) याच्यासोबत नागपुरला गेला होता.
काल ३० जूनच्या संध्याकाळी साडेसहाला नागपुरातून दोघेही छत्रपती संभाजी नगरला जाण्यासाठी बसले होते. 

१९ आणि २० नंबरच्या बेडवर दोघेही होते. कारंजा लाड फाट्याजवळ जेवण करण्यासाठी बस समृध्दी महामार्गावरून खाली उतरली, त्यानंतर जेवण करून आम्ही पुन्हा समृध्दीवर चढलो असे योगेश सांगत होता. जेवणानंतर बसमधील प्रवाशी निवांत झोपलेले होते.

  "मध्यरात्री दीडच्या सुमारास मी पाणी पिण्यासाठी उठलो. बसच्या आतील लाईट बंद होते. तेवढ्यात बस उलटली, माझ्या पायाला ,हाताला मुक्का मार लागला. बस उलटल्याने सगळे प्रवाशी झोपेतून उठले मात्र नेमके काय झाले हे कुणाला कळायच्या आत बसने पेट घेतला. बस उलटने आणि पेट घेणे या दोन्ही गोष्टी सोबत झाल्या. गाडीत पडदे, गाद्या,कपडे असल्याने बस झपाट्याने पेटत होती. आम्ही मागच्या बाजूला असल्याने थोडा वेळ मिळाला. तेवढ्यात माझा मित्र आणि आमच्या मागच्या सीटवर असलेल्या एकाच्या मदतीने काचा फोडल्या. आम्ही तिघे बाहेर आलो आणि एकाला हात देऊन खिडकीतून बाहेर काढले" असे योगेशने सांगितले.

   मात्र अधिकच्या प्रवाशांना वाचवता आले नाही, बसमधून ओरडण्याचा किंचाळण्याचा आवाज येत होता मात्र आता बस जवळ जाताही येत नव्हते. काही मिनिटांत बस मधील प्रवाशांचा आवाज येणे बंद झाले.  १५ ते २० मिनिटांत पोलीस, गावकरी , अग्निशामक विभाग तिथे पोहचले .परंतु तोपर्यंत काहीच उरले नाही सांगताना योगेशला अश्रू अनावर झाले होते.