पोलिसांनी त्या ६६ जणांची काढली हिरोगिरी!
दसरा, दिवाळीला गाड्यांची खरेदी केल्यानंतर काही दिवसांच्या आत आरटीओ कार्यालयाकडून वाहन नोंदणी करणे नियमाप्रमाणे बंधनकारक असते. मात्र बरेच जण या नियमांचे उल्लंघन करताना दिसतात. याशिवाय वाहनांच्या नंबर प्लेटवर दादा, राजे असे शब्द नंबरच्या माध्यमातून लिहिण्याचा ट्रेंडही वाढला आहे. नियमानुसार नंबर प्लेटवरील नंबर हा सहज वाचता यावा व सगळ्यांना कळेल असा असणे बंधनकारक आहे. नंबर प्लेट वर नंबरव्यतिरिक्त दुसरे कोणतेही चित्र छापणे गुन्हा आहे. असे प्रकार करणाऱ्यांवर आज कारवाईचा फास आवळण्यात आल्याचे दिसून आले. कारवाई केलेल्या ६६ वाहनांपैकी ५८ जणांना दंड वसूल करून सोडून देण्यात आले. ८ जणांनी दंड न भरल्याने वाहने पोलीस ठाण्याच्या आवारात जमा केली आहे. कारवाईत ठाणेदार प्रदीप साळुंके यांच्यासह एपीआय श्री. अहिरराव, एपीआय नीलेश लोदी, पोहेकाँ लक्ष्मण कटक, पोहेकाँ महादेव इंगळे, पोहेकाँ दिलीप पवार, पोहेकाँ रमेश पवार, पोहेकाँ विनोद गायकवाड, नापोका सुनिल किनगे, पोकाँ नाजुकराव वानखेडे यांनी भाग घेतला.