रेतीमाफियांची मुजोरी! घरासमोरून रेती वाहने नेण्यास विरोध करणाऱ्या तरुणाला विष पाजले!!; जळगाव जामोद तालुक्यातील घटना
गोळेगाव खुर्द येथे सूरज गजानन पांडे पत्नीसह राहतो. त्याचा मोठा भाऊ शिवाजीने दिलेल्या तक्रारीनुसार, सूरजच्या घरासमोरील रस्त्यावरून रेती वाहतूक करणारे लोक वाहनात रेती भरून घेऊन जातात. त्यामुळे सूरजच्या घरात धूळ जात होती. ट्रॅक्टरने रेती वाहतूक करणाऱ्या गावातीलच बाळकृष्ण दुलाजी नाईक (५५), पुंडलिक रामभाऊ घुळे (५३) व रतन दुलाजी नाईक(५०) यांना घरासमोरून रेती घेऊन जाऊ नका. माझ्या घरात धूळ येते, असे म्हणत सूरजने विरोध केला होता.
त्यामुळे काल पहाटे तिघांनी सूरजच्या घरात घुसून त्याला जबरदस्ती विषारी औषध पाजले. आरडाओरड एकूण सूरजचे वडील व भाऊ धावत आल्याचे दिसताच तिघांनी पळ काढला. अत्यावस्थेत सूरजला आधी जळगाव जामोद येथील ग्रामीण रुग्णालयात व त्यानंतर खामगाव येथील शासकीय रुग्णालयात दाखल करण्यात आले. जळगाव जामोद पोलिसांनी बाळकृष्ण नाईक, पुंडलिक गोळे व रतन नाईक यांच्याविरुद्ध गुन्हा दाखल केला आहे.