BULDANA LIVE SPECIAL अंदर की बात! खामगावात नकली नोटांचे रॅकेट? प्रकरण दाबण्यासाठी कुणी केली देवाण - घेवाण? ठाणेदारांनी ठेवले कानावर हात, म्हणाले, "हे आमचे अंतर्गत वाद"!

  सुरू असलेल्या चर्चेनुसार प्रकरण १२ ते १५ दिवसाआधीचे आहे. "त्या" तीन पोलिस कर्मचाऱ्यांना एका घरात नकली नोटा असल्याची माहिती प्राप्त झाली. तिघांनी तिथे पोहचल्यावर कारवाई करणे किंवा वरिष्ठांना कळवणे अपेक्षित असताना तसे न करता त्यात मोठी आर्थिक देवाण घेवाण झाल्याची चर्चा आहे. तडजोडीचा आकडा लाखांच्या पटीत असल्याची असल्याची चर्चा आहे. दरम्यान सगळ "पचवल्यानंतर"   ५ -६ दिवसांनी या प्रकरणाची बोंब झालीच.विषय एसपी सुनील कडासने यांच्यापर्यंत देखील पोहचला असून त्यांनी अप्पर पोलीस अधीक्षकांना चौकशीच्या सुचना दिल्या आहेत. दरम्यान या कथित नकली नोटा प्रकरणातील एक पोलिस कर्मचारी चांगलाच वादग्रस्त असल्याचे सूत्रांनी सांगितले..

म्हणून संशय वाढतोय..!

सुरू असलेल्या चर्चेत तथ्य आहे असा संशय येण्यासही काही कारणे आहेत. खामगावात याआधीही बनावट नोटांचे रॅकेट उघडकीस आले आहे. या कथित प्रकरणात पोलीस कर्मचाऱ्यांनी ज्यांच्याशी तडजोड केली अशी चर्चा आहे त्या खामगावचे रहिवासी असलेल्या तिघांवर फेब्रुवारी २०२३ ला हिंगोली जिल्ह्यातील औंढा नागनाथ पोलीस ठाण्यात बनावट नोटा देऊन महिलेची फसवणूक करण्याचा गुन्हा दाखल आहे. १ लाख रुपयांचे ३ लाख देतो असे आमिष खामगावच्या तिघा भामट्यांनी महिलेला दाखवले होते. महिला तब्बल १० लाख रुपये घेऊन त्यांच्याजवळ पोहचली होती. त्या भामट्यांनी ४० लाख रुपयांच्या नकली नोटा असलेली बॅग महिलेच्या ताब्यात देऊन पोबारा केला होता. नाकाबंदी करून पोलिसांनी आरोपींना अटक केली होती.
या प्रकरणानंतर दुसऱ्याच दिवशी पोलिसांनी त्या  आरोपींच्या खामगाव येथील  घरातून ७५ लाख रुपयांच्या बनावट नोटा आणि बनावट सोने जप्त केले होते. अकोला जिल्ह्यातील तेल्हारा पोलीस ठाण्यात देखील फेब्रुवारी २०२२ मध्ये खामगावच्या एकाविरुद्ध बनावट नोटा प्रकरणात गुन्हा दाखल आहे. ज्याच्याविरुद्ध गुन्हा दाखल आहे तो आरोपी सध्या चर्चेत असलेल्या कथित बनावट नोटा प्रकरणाशी संबंधित असल्याची चर्चा आहे...

तर सत्य समोर येईल...

खामगावच्या या कथित नकली नोटा प्रकरण दाबण्यासाठी पोलीस कर्मचाऱ्यांकडून आर्थिक देवाणघेवाण झाल्याचा "आखो - देखा" पुरावा समोर येण्याची शक्यता नाही. मात्र एसपी सुनील कडासने यांच्या नेतृत्वात याआधी जिल्हा पोलिस दलाने कुठलाही पुरावा नसलेल्या अनेक गुन्ह्यांचा यशस्वी उलगडा केला आहे. चंदनपुर हत्याकांड, अलीकडील येरळी पुलावर झालेला दरोडा, राहेरी पुलावरील लुटमार प्रकरण ही त्याची ताजी उदाहरणे आहेत. त्यामुळे पोलीस दलातील हे कथित अंतर्गत प्रकरण तपासासाठी आव्हानात्मक आहे असे नाही. या कथित प्रकरणात "त्या" घटनास्थळाकडे जाणारे सीसीटिव्ही फुटेज तपासासाठी सहाय्यक ठरू शकतात. ज्या आरोपींचा याआधी इतर जिल्ह्यातील नकली नोटा प्रकरणात समावेश आहे, ते आरोपी खामगाव शहरातीलच आहेत. त्यामुळे बनावट नोटांची वाहतूक खामगावातून झाल्याचे याआधीच समोर आले आहे. त्या आरोपींसोबत या कथित पोलीस कर्मचाऱ्यांचे काही संबंध आहेत का हेदेखील तपासण्याची गरज आहे..या प्रकरणात खर काय ते लवकर समोर आल तर चांगल्या अधिकारी - कर्मचाऱ्यांवरील संशयाचे ढग लवकर दुर होतील..अर्थात एसपी सुनील कडासने यांनी हे प्रकरण मनावर घेतलं तर यातील सोक्षमोक्ष लवकर लागेलच यात शंका नाही. दरम्यान याप्रकरणी "बुलडाणा लाइव्ह"ने संबधित पोलीस स्टेशनच्या ठाणेदारांना याप्रकरणाची विचारणा केली असता "आमच्याही कानावर आहे,पण ती कुणीतरी वावडी उठवलेली आहे..आमच्यात अंतर्गत वाद आहेत" असे म्हणत अधिक बोलण्यास नकार दिला..