मोठी बातमी! झारखंडचे ATS बुलडाण्यात!!
बुलडाणा (बुलडाणा लाइव्ह वृत्तसेवा) ः झारखंड राज्यात सध्या नक्षल्यांविरुद्ध मोठी मोहीम उघडण्यात आली आहे. गेल्या आठवड्यात सीआरपीएफमध्ये काम करणाऱ्या अविनाश उर्फ चुन्नू कुमार या जवानाला दहशतवादविरोधी पथकाने अटक केली होती. वेगवेगळी घातक शस्त्रे नक्षल्यांना व गुंडांना पुरविल्याचा त्याच्यावर आरोप आहे. त्याच्या चौकशीत त्याने नक्षलवाद्यांना व गुंडांना शस्त्रे विकल्याची कबुली दिली आहे. त्याच्याकडून हाती आलेल्या महत्त्वाच्या माहितीवरून, झारखंड दहशतवादविरोधी पथकाने (एटीएस) २० नोव्हेंबरला सकाळी दहाच्या सुमारास बुलडाणा जिल्ह्यातही छापेमारी केली. मध्यप्रदेशातून जिल्ह्यात शस्रे विकण्यासाठी आलेल्या तिघांना जेरबंद करून त्यांच्याकडून १४ देशी पिस्तुल व तब्बल १६० जिवंत काडतुसे जप्त करण्यात आली आहेत. टुनकी (ता. संग्रामपूर) येथे ही कारवाई करण्यात आल्याचे पोलीस सूत्रांनी सांगितले.