२ एकर शेतीत काय काय होणार? दवाखान्याला पैसे पुरेना; कर्जबाजारीपणाला कंटाळून पती - पत्नीची आत्महत्या; नांदुरा तालुक्यातील हृदयद्रावक घटना

कर्जबाजारी पणाला कंटाळून पती पत्नीने विषारी औषध प्राशन करून आत्महत्या केली. वसंत जगदेव डामरे (७०) आणि सरलाबई वसंत डामरे (६५) असे आत्महत्या करणाऱ्या दाम्पत्याचे नाव आहे. २ एकर शेतीच्या भवश्यावर हे कुटुंब संसाराचा गाडा ओढत होते. गेल्या काही दिवसांपासून सरलाबाई आजारी असल्याने त्यांच्या दवाखान्यासाठी मोठा खर्च झाला. घरखर्च, दवाखाना या कामासाठी बँकेचे कर्ज व इतर बाहेरचे खाजगी कर्ज कुटुंबावर होते. सरलाबाईंच्या दवाखान्यासाठी आणखी खर्च लागणार होता. आणखी पैसे आणायचे कुठून ? या विवंचनेत ते होते. त्यामुळे दोघांनी रात्रीच मोनोसिल नावाचे औषध प्राशन करून जीवनयात्रा संपवली. या घटनेमुळे परिसरात हळहळ व्यक्त होत आहे . बोराखेडी पोलीस ठाण्यात याप्रकरणी आकस्मिक मृत्यूची नोंद करण्यात आली आहे.