खुन्यांची माहिती देणाऱ्यांना ५० हजारांचे बक्षीस जाहीर!

१६ नोव्हेंबर रोजी रात्री पावणेदहाला चिखली रोडवरील जयस्तंभ चौक परिसरातील आनंद इलेट्रॉनिक्सचे मालक कमलेश पोपट यांची तीन चोरट्यांनी चाकूने भोसकून निर्घृण हत्या केली होती. हा संपूर्ण प्रकार सीसीटीव्हीत कैद झाला होता. या घटनेमुळे संतप्त व्यापाऱ्यांनी व भाजपने १७नोव्हेंबर रोजी कडकडीत बंद पुकारला होता. या घटनेमुळे व्यापारीही दहशतीखाली आहेत. रोज रात्री दहापर्यंत चालणारी दुकाने आता साडेआठ -नऊलाच बंद होत आहेत. दुसरीकडे पोलिसांनीही खुन्यांना पकडण्यासाठी कंबर कसली असून, सर्व मार्गांचा अवलंब करून खुन्यांच्या लवकरात लवकर मुसक्या आवळण्यासाठी प्रयत्‍न सुरू आहेत. काल, १७ नोव्हेंबरच्या रात्री पोलिसांनी दोन संशयितांना ताब्यात घेतले. जिल्ह्यातील एका वस्तीवर पोलीस संशयितांना पकडण्यासाठी गेले तेव्हा स्थानिक रहिवाशांनी पोलिसांना विरोध केला .डोळ्यांत मिरची पूड फेकण्याचीही प्रयत्न झाला. मात्र पूर्ण तयारीने गेलेल्या पोलिसांनी दोघांना उचलले. मात्र प्रकरण संवेदनशील असल्याने पोलिसांकडून याबाबत कमालीची गुप्तता पाळण्यात येत आहे. संपूर्ण अधिकृत सत्य उघड येईपर्यंत व तपासासंदर्भात गोपनीयता पाळण्यात येत असल्याने या संशयितांना कुठून उचलले, याबाबतची माहिती पोलिसांनी जाहीर केलेली नाही.