चिखलीत आज संध्याकाळी युवक काँग्रेसच्या दहीहंडीचा माहौल! विरोधी पक्षनेते विजय वडेट्टीवार राहणार उपस्थित; अभिनेत्री प्रार्थना बेहरे प्रमुख आकर्षण;
Sep 6, 2023, 12:23 IST
चिखली(बुलडाणा लाइव्ह वृत्तसेवा): गेल्या २० वर्षांपासूनची सांस्कृतिक परंपरा असलेला चिखलीतील मानाचा दहीहंडी सोहळा आज,६ सप्टेंबरच्या सायंकाळी संपन्न होणार आहे. श्री छत्रपती शिवराय क्रीडा प्रतिष्ठानचे संस्थापक अध्यक्ष राहुल बोंद्रे तसेच युवक काँग्रेसच्या वतीने आयोजित करण्यात आलेल्या या दहिंडीचे यंदा सिने अभिनेत्री प्रार्थना बेहरे प्रमुख आकर्षण राहणार आहे. शिवाय राज्याचे विरोधी पक्षनेते ना. विजय वडेट्टीवार हेदेखील या सोहळ्याला उपस्थित राहणार आहेत. काँग्रेस नेते कुणाल बोंद्रे व त्यांची संपूर्ण टीम या सोहळ्याच्या आयोजनासाठी झटत असून कार्यक्रमाची तयारी पूर्ण झाली आहे. आता अवघ्या चिखलीकरांना या दिमाखदार सोहळ्याची प्रतीक्षा आहे. लोकशाही संरक्षणार्थ यंदाची जनसंवाद दहीहंडी असून या सोहळ्याला मोठ्या संख्येने उपस्थित राहण्याचे आवाहन काँग्रेसचे जिल्हाध्यक्ष राहुल बोंद्रे यांनी केले आहे.
या कार्यक्रमाची पूर्व तयारी अंतिम टप्प्यात आली आहे. चिखलीतील हा दहीहंडी सोहळा युवकांसाठी स्फूर्तीदायक ठरणार आहे. परिसरातील गोविंदांनी साहसी खेळ असलेल्या या सोहळ्यात मोठ्या संख्येने सहभागी व्हावे असे आवाहन राहुल बोंद्रे यांनी केले आहे. २० वर्षांची सर्वात जुनी परंपरा असलेल्या या दहीहंडी उत्सवात ५ लक्ष रुपयांच्या बक्षिसांची लूट गोविंदा पथकांना करता येणार आहे,चिखली शहराच्या सांस्कृतिक परंपरेचा वारसा जोपासणारा हा दहीहंडी उत्सव आहे असेही राहुल बोंद्रे यांनी म्हटले आहे.दरम्यान आज होणाऱ्या या दहीहंडी सोहळ्याला अलोट गर्दी उसळणार असल्याने चिखली पोलिसांनी चोख बंदोबस्त ठेवण्याचे नियोजन केले आहे.