जिल्ह्याच्या भूमिपुत्राला राजस्थानमध्ये वीरमरण! मंगरुळ नवघरेचे संदीप गोजरे शहीद; उद्या अंत्यसंस्कार! पत्नीवर आभाळ कोसळले, सावरायला कुणीच नाही...

 संदीप दिनकर गोजरे(३३) हे १४ वर्षांपूर्वी भारतीय सैन्यात भरती झाले होते. सध्या ते राजस्थान मधील गंगानगर येथे कर्तव्यावर होते. त्यांना दोन मुले असून एकाचे वय १० तर दुसरा ६ वर्षांचा आहे. कर्तव्यावर असताना प्रकृती अस्वास्थ्यामुळे त्यांना सैन्य रुग्णालयात दाखल करण्यात आले होते मात्र उपचारादरम्यान त्यांचा मृत्यू झाला. त्यांच्या पश्चात पत्नी,आई,वडील, भाऊ आणि दोन मुले असा परिवार आहे.

पत्नीवर आभाळ कोसळले..

वीर जवान संदीप कुटुंबीयांसह गंगानगर येथे राहत होते.सध्या संदीप यांच्या पार्थिवासोबत संदीप आणि त्यांची दोन कोवळी मुळे आहेत. पतीच्या मृत्यूने एवढे मोठे संकट कोसळले असताना संदीप यांच्या पत्नीला सावरायला देखील कुणी नाही, स्वतःच्या दुःखाला आवर घालायचा की मुलांना सावरायचे अशी स्थिती त्यांच्यावर ओढवली आहे. आज दुपारी ४ वाजता दिल्ली येथून विमानाने संदीप यांचे पार्थिव छत्रपती संभाजीनगर येथे आणण्यात येणार आहे, उद्या सकाळी मोटारीने पार्थिव मंगरुळ नवघरे येत आणल्यानंतर शासकीय इतमामात अंत्यसंस्कार करण्यात येतील.