लोणार तहसील कार्यालयात लघुशंकेचे वांधे! नागरिकांनाच काय अधिकारी, कर्मचाऱ्यांनाही उघड्यावर उरकावा लागतो कार्यभार; स्वच्छता करायचे जीवावर आले म्हणून स्वच्छतागृहाला थेट कुलूपच लावले
संपूर्ण तालुक्यातून नागरिक आपल्या कामासाठी तहसील कार्यालयात येतात. मात्र सुरेश कव्हळे तहसीलदार असताना ज्या झपाट्याने कामांचा निपटारा व्हायचा ती गती आता दिसत नाही. तहसीलदार गिरीश जोशींचा अधिकारी कर्मचाऱ्यांवर अंकुश नाही. साधे स्वच्छतागृह साफ करून घेणे सुद्धा तहसील प्रशासनाला जमत नाही. तहसील कार्यालयातील पुरुष प्रसाधन गृहाची अतिशय दुरावस्था झाली.
याआधी अशा आशयाचे एक वृत्त झळकल्यानंतर तहसील प्रशासनाने घाणेरड्या स्वच्छतागृहाची सफाई करण्याऐवजी स्वच्छ्तागृहाला कुलूप लावून टाकले. तहसील कार्यालयातील मोजक्या चार दोन कर्मचाऱ्यांजवळ त्याच्या चाव्या आहेत. मात्र सामान्य नागरिकांना आणि इतर अनेक कर्मचाऱ्यांना उघड्यावर लघुशंकेला जावे लागते.
तहसीलदार गिरीश जोशी यांनी ही बाब गांभीर्याने घेण्याची गरज आहे. एकीकडे नागरिकांना स्वच्छतेचे धडे द्यायचे अन् दुसरीकडे आपल्या प्रशासकीय कार्यालयात येणाऱ्या नागरिकांना उघड्यावर पाठवायचे हे कुणालाही पटणारे नाही..त्यामुळे तहसीलदार महोदय, बघा तुमच्याकडून जमते का..!