आमदार असावा असा...शेतकऱ्यांनी नुकसानीची कहानी ऐकवताच आमदार सौ. महाले यांनी मंत्र्यांची घेतली भेट!; त्वरित पंचनामे करून निकषानुसार प्रस्ताव सादर करण्याचे जिल्हाधिकाऱ्यांना आदेश!!
आमदार सौ. श्वेताताई महाले पाटील यांनी निवेदनात म्हटले आहे, की आज २८ डिसेंबरला सायंकाळी पश्चिम विदर्भ, विशेषतः बुलडाणा जिल्ह्यात तुफान गारपीट आणि वादळी पाऊस झाला. अचानक आलेल्या नैसर्गिक संकटाने शेतकरी हादरून गेला असून, पिकांच्या मोठ्या नुकसानीला त्याला सामोरे जावे लागले आहे. अगोदरच अतिवृष्टी व नापिकीने शेतकरी त्रस्त आहे.
राज्य शासनाने शेतकऱ्यांना कोणतीही मदत दिलेली नाही. चिखली तालुक्यात खरीप हंगामात प्रचंड नुकसान होऊनही कोणतीही मदत राज्य शासनाने दिलेली नाही. जून महिन्यातील झालेल्या ढगफुटीची देखील मदत दिलेली नाही. परतीच्या पावसाने नुकसान झाल्यावर देखील राज्य शासनाने तर कोणतीच मदत दिली नाही. त्याचप्रमाणे पीक विमा कंपनीने सुद्धा अद्याप नुकसान भरपाई दिलेली नाही. त्यातच आज झालेल्या गारपीट व वादळी पावसाने तो चिंताग्रस्त झाला आहे. त्यामुळे नुकसानीचे तातडीने पंचनामे करून आर्थिक मदतीचा दिलासा देण्याची मागणी आ. सौ. महाले पाटील यांनी केली. मंत्री वडेट्टीवार यांनी जिल्हाधिकाऱ्यांना तातडीने पंचनामे करून निकषानुसार प्रस्ताव सादर करण्याचे आदेश दिले. त्यामुळे शेतकऱ्यांत आशेचा किरण निर्माण झाला आहे.