लाखो रुपये खर्चून शिदोरीगृह बांधले पण...आता बेकार दुरावस्था; लोक येऊन मुततात ! चिखली कृषी उत्पन्न बाजार समितीचे नवनियुक्त सभापती लक्ष देतील का?

२०११ -२०१२ मध्ये तत्कालीन संचालक मंडळाने महाराष्ट्र कृषी स्पर्धा क्षण प्रकल्पाअंतर्गत लाखो रुपये खर्चून शिदोरीगृह बांधले. बाजार समितीत शेतमाल विक्री करण्यासाठी आलेल्या शेतकऱ्यांना, हमाल बांधवांना दुपारचा जेवणाचा डब्बा तिथे खाता यावा, काम होईपर्यंत थोडीफार विश्रांती घेता यावी हा त्यामागचा उद्देश बांधकाम करतांना सांगण्यात आला होता. मात्र ज्या उद्देशासाठी लाखो रुपये खर्चून शिदोरीगृह बांधण्यात आले तो उद्देश मात्र बाजूलाच राहिल्याचे दिसत आहे. 
    

सद्यस्थितीत या शिदोरीगृहाची अतिशय दयनीय अवस्था झाली आहे. शिदोरीगृहाच्या दरवाजाजवळ जायचे म्हटले तरी नाकाला रुमाल लावून जावे लागते. डुकरांचा मुक्त संचार सुरू आहे एवढेच काय तर शिदोरीगृहाच्या भिंती मुत्रविसर्जनासाठी उपयोगात आणल्या जात आहेत. अधूनमधून हे शिदोरीगृह काही व्यापाऱ्यांना भाड्याने सुद्धा दिल्या जात असल्याचे कळते. त्यामुळे ज्या उद्देशाने शिदोरीगृह बांधले त्या उद्देशांना हरताळ फासल्या जात असल्याचे शेतकऱ्यांनी "बुलडाणा लाइव्ह" शी बोलताना सांगितले. नवनियुक्त सभापती आणि संचालकांनी याकडे लक्ष देण्याची अपेक्षा व्यक्त होत आहे.